تانية ميكانيكا القصة الكاملة

[AhmedKashifSchrodinger]

^^ أهلا و سهلا بيكم يا أبطال ^^

منتدى سنة تانية القديم واقع و حبيت

اجيب التوبيك دا من ال Backup بتاعى

لأن مهم ان الناس تشوفه خصوصا اليومين دول


التوبيك دا بإذن الكريم فيه كل المعلومات الممكنة عن تانية ميكانيكا

نتقدم بالشكر لجميع البشمهندسين و البشمهندسات اللى ساعدونا

البشمهندسة Nepton

البشمهندس Scorpiano

بجد الناس شرحت كل حاجة بالتفصيل الممل على أعلى مستوى

و أكبر قدر من الدقة و الصراحة كمان

[AhmedKashifSchrodinger]

Scorpiano said

اولا مفيش عملى في اى مادة حتى لو دخلت معمل فأنت هتتفرج

بس فيه شفوى وده مهم جدا لان فيه درجات ممكن تطلعك

وممكن تنزلك سابع ارض وهما اربع مواد

ثيرمو وفلويد ترم اول وهيت ترانسفير وميجر ترم تاني

غير كدة اعمال السنة ممكن تاخدها وبسهوله جدا

انك تحضر وتحل شيتاتك ومش كتير اوى

فيه بعض المواد مش ليها ميد ترم زى الديزاين والميجر

المواد الممتده هي الديزاين والثيورى فقط ومش ليهم امتحان ترم اول

[AhmedKashifSchrodinger]

Nepton said

اولا اللى يفرق سنة تانية عن باقى السنين انها محتاجة متابعة من اول السنة

ومذاكره اول بأول وانك متكومش المواد عليك علي اد متقدر

ولو حصل ومقدرتش تذاكر بعض محاضرات فعلى الاقل اقرا

المحاضرة في نفس اليوم اللي خدتها فيه وعلى فكرة سنة تانية

مش بالصعوبة اللي الناس متخيلاها بس من كتر م فى ناس

خوفتنا منها فدخلناها قلقنين منكرش انها سنة تقيلة

واكيد هتغير فيك كتير وفعلا هي بداية ان تكون مهندس

بجد فحاول انك تاخدها زي اي سنه عادية بس بجدية ومذاكرة

و متابعة مع المعيدين و الدكاترة .

بالنسبة للمواد الدراسية هما 10 مواد 7 ترم اول و 5 ترم تانى

لأن ف مادتين ممتدين وهم الديزين والثيورى فانت بكدة

هتمتحن في 5 مواد في الترم الاول و 5 في الترم التانى

ده لو مقسموش الديزين والثيورى علي الترمين و خللهم امتحان

ترم اول وترم تانى لانهم احتمال يغيروا اللائحة السنه دية

وعلى كلا انا هحاول اكلمك على هذه المواد .

مواد الترم الاول

الإقتصاد

الماده دية من المواد الصغيرة ولكنها ماده مهمة لاى مهندس

انت بتاخد فيها ازاي تاخذ قرار بناءا ل دراسة بسيطة

انت بتقوم بيها يعني مثلا لو عندك مشروعين و مش عارف

اتنفذ ايا منهم فسوف تقوم بدراسة كل مشروع وبعمل مقارنة بينهم

وتشوف مين اللي هيكسبك اكتر او اى من المشروعين تكلفة الانفاق

عليه اقل ومن هنا تستطع ان تحدد اي مشروع ستنفذه ولعمل

هذه الدراسة سوف تاخذ بعض المعادلات وبعض المصطلحات

وسوف تستخدم جداول ده زى نبذة بسيطة عن المادة .

المادة دى كانت علينا كمادة انسانيات يعني لاقدر الله الواحد

لو كان شيلها مع مادتين تانيين يعدي السنة بس تقريبا والله اعلم

هيخلوها ماده اساسية بعد كدة المادة عليها 75 درجة

50 فاينال و25 اعمال سنة

بالنسبة للدراسة

المادة دية مش صعبة بس مشكلتها ان الناس بتهملها وسط الثرمو والسترس والمواد التقيلة دية اهم حاجة فى هذه المادة هو حضور المحاضرات وان تكتب فيها كويس علشان لو حصل ومقدرتش تذاكرها اول باول فتقدر تفهم اللي كتبته ودكاترة المادة كانوا كوسين وتقدر تسالهم

بالنسبة للمذاكرة

هتذاكر من المحاضرات والسكاشن وتحل الشيت كويس وتسال فيه اول باول علي قد متقدر لان فعلا الواحد من باقي المواد بيقوم هملها بس حاول متسبهاش فترة كبيرة لأن فعلا في ناس كتير شالتها السنه دية وعشان كده انا بدات بيها

بالنسبة للامتحان

امتحانات بتيجى كويسة وهتقدر تحل فيها كويس لو فهمت وذاكرت المادة كويس طبعا المادة ديه ليها ميد ترم وكان جي كويس بس زي مقولت المشكلة في اهمالها

[AhmedKashifSchrodinger]

الثرمو

طبعا انتم درستوا فيها جزء فى سنة أولى عشان كدة انا هخش فيها على طول

بس قبل ما ابدأ لازم اقول انها هتدرس في ترم واحد زى سنة اولى

بس فعلا في فرق كبير المنهج كبير في سنه تانية وعندك حوالى

8 او 9 شيتات انا مش بخوفك بس انا بقول كدة علشان في طلبة

فى سنه اولى مكنتش بتذاكر المادة دية غير في الاخر وقدرت تلمها

بس معتقدش ان ده ينفع في تانية وخصوصا لو عايز تفهم

الثرمو عليها 200 درجة 120 فاينل

وتقريبا 40 شفوى و20 ميدترم و20 اعمال سنة

بالنسبة للدراسة

أول جزء في المنهج عبارة عن كل اللي دراسته في اولى وعليه شيت

أو اتنين مش فاكرة فياريت لو تقدر تراجع علي منهج اولى قبل

متبدأ الدراسة يبقي كويس وهتجد مرجع الثرمو في المواد الدراسية

لقسم ميكانيكا ويفضل ان تشتغل منه اثناء الدراسة واسلوبه سهل ومفهوم

وطبعا مهم حضور المحاضرة ايا كان الدكتور انا بقول كده لان

كان عندنا 6 دكاترة للمادة وكنا 3 مجاميع فكل مجموعه لها دكتورين

ودى كانت مشكلة لان الدكاترة مكنتش ماشية زي بعض وأسلوب الشرح

مختلف لكل دكتور فكان في مجموعه دكاترها كويسة ومجموعة لا

وطبعا كان في بعض الاجزاء فيها لخبطة بس السكاشن الشرح

فيها كويس جدا وخصوصا سكاشن بشمهندس عمرو

وبشمهندس عاصم وان شاء الله متحصلش المشكله دية تانى .

بالنسبة للمذاكرة

من المحاضرات والمرجع والسكاشن وحل الشيتات اهم حاجة المتابعة

في حل الشيتات لان الشيت فيه مسائل كتيرة

من بعد الميد ترم هتجد ان المنهج شد شوية وتاخد cyclesكتيرة زى

Steam power plant

وغيرها وهتجد الشيتات في هذا الجزء فيه اكتر من فكرة

وفى مسائل بتاخد وقت في الحل و بتبدأ تمسك خريطة كبيرة

علشان تطلع منها الخواص زى enthalpy بدلا من استخدام جداول المية

فممكن تلاقى المسألة خدت منك ساعة او اكتر فلازم

تدرب نفسك على السرعة

فى استخدام الخريطة يعني تحل المسألة من الاول للاخر

بارقام مش صح صح صح

وخلاص وتشوف خدت منك اد ايه مثلا ساعة وربع اول مرة

وتكتب الزمن ده جنب

المسألة وتحل مسألة تانية وهكذا الى ان تجد المسألة خدت منك

ساعة الا ربع او اقل

قد يكون هذا الكلام مش وضحلك دلوقتى بس لما توصله فى

المنهج هيوضح اكتر

بس انا بقولك الكلام ده لان امتحانا بجانب ان كان فيه بعض

افكار كان محتاج ايضا

سرعة فى الحل وده هيجي من التعود علي حل مسائل

بوقت مش بس

فى الثرمو بل في كل المواد

بالنسبة للشفوى

دية تقريبا اول مرة تتسألوا فيها شفوى اه صحيح اتسالوا شفوى

في المعامل او الورش بس ده شفوى علي المادة اللي درستها

عشان يقيم مدي فهمك بس مش كل الدكاترة الشفوى بتعها صعب

فى وفى وبعدين ليه نحط نفسنا في موقف ونقول ده الدكتور ده صعب

والدكتور ده سهل مااحنا من الاول نذاكر ونروح نسال الدكاترة فى

اللى مش فهمينه ونتابع مع المحاضرة والسكشن ومدام انت مذاكر

وحاولت تفهم ان شاء لله هتقدر تجاوب كويس صحيح الشفوى

ليه رهبته في الاول بس بعد كده هتتعود كان في دكتور قلنا

اعتبروا الشفوى كانه interview ليك فعلا اعتبروه interview صغير استعدادا للinterview الكبير ومع ذلك انا كنت مرعوبة من اول امتحان شفوى بس اهم حاجه ف الشفوى ان يكون عندك ثقة في اللي بتقوله وده هايجى لو حولت تفهم طووول الترم.

بالنسبة للإمتحان

زى ما قولت قبل كده حاول ان تحل امتحانات سابقة بالكامل و بوقت

لأن الامتحان هيبقي في بعض افكار وبيبقى طويل ومن الاخر مدام

انت مذاكر كويس اكيد هتحس ان الامتحان سهل

[AhmedKashifSchrodinger]

الإسترس

المادة دية مهمة جدا وخصوصا وانك الترم التانى هتستخدمها

فى حسابات الديزاين المادة من 100درجة 70 فاينل و30 اعمال سنة

مشكلة المادة دية ان الجزء الاول فيها معتمد علي structure اولى

وجزء الstress and strain ده انا مفهمتوش غير فى الاسبوع

اللي قبل الامتحان لما خدت مجموعة

بس انا مش عارفة اذا كان اداكوا نفس الدكتور ولا حد غيره

وعلي كلا انا شايفة انك تراجع على جزء

properties of area and stress and strain

لأنه هيفيدك

فى بداية المنهج وتراجع ايضا عليframes لأن

الدكتور بيحب يدخل

اللى درسناه معاه في افكار الفرامز في امتحانات وللأسف

مش بيبقى

في افكار الفريمز في الشيتات وده طبعا من حق الدكتور انه

يربط اللي خدنا العام الماضي باللى بندرسه بس زى ما قلت ان انا

مكنتش فاهمة استركشر اولى علشان كده بقولك يا بشمهندس

حاول انك تفهم استراكتشر اولى من ورق او سيرشات قبل ما تدخل

سنة تانية انا بقولك الكلام ده لان انا كان نفسي حد يقولهولى

اقبل ما أدخل سنة تانية بس ده انا شايفاه مهم من وجهة نظرى

ومهم تراجع علي trussلان الدكتور ممكن يدلكوا فكرة

مساله معتمده على التراسس

بالنسبة للدراسة

طبعا حضور المحاضرات وتكتب كويس وراء الدكتور وتركز لو عمل

معاكم اثبات لان الدكتور جاب اثبات في الفينال وكان قاله

فى المحاضرات

المحاضرة ممكن تلاقيها سريعة شوية لأن الدكتور

بيشرح بprojector س الدكتور هيحددلكو مواعيد

تسألو فيها وممكن تلاقيه معاكم فى السكاشن

المحاضرت والسكاشن ولو عرفت تجيب ورق مرجعات السنة

دية من حد اكبر منك بسنة وكان بياخد كورس

مع البشمهندس ايمن الكينج لان الورق ده هيمرنك على

افكار قوية بدل متجيبوا في الاخر وتلاقي الافكار دية

ومتلحقش تخلصها او تفهمها قبل الامتحان لان المشكلة التانية

فى الماده دية ان الشيتات سهلة بالمقارنة بالامتحانات وبقولك

من حد كان بياخد كورس لأن الورق في اخطاء والبشمهندس

بيصلحه في الكورس

بالنسبة للامتحان

نفس الكلام اللي قولناه ف الثرمو

[AhmedKashifSchrodinger]

السركتس

النظام فيها نفس نظام سركتس اولى المادة من 100 70 فاينال و30 اعمال سنة

د/محمود عبدالحميد هو اللي هيدرس المادة وفى دكتور تانى هيدرس معاه

وكانوا قالولنا اول مدخلنا ان احنا نراجع علي شوية حاجات

اللي فاكراه ان نراجع على Mesh and Node methods

و تقريبا علي جزء AC مش متذكرة اوى

برده هتخدوا كتاب قبل الميد ترم ويتصحح وكتاب بعد الميد ترم

وطبعا زي مانتوا عارفين اسلوب دكتور محمود هوا هواه في تانية

بالنسبة للمذاكرة زى مذاكرة سنة اولى تحضر المحاضرة

وتكتب مع الدكتور وتحل الكتاب بإيدك وهي ايضا تعتبر من المواد السهلة

[AhmedKashifSchrodinger]

الفلويد

الماده دية يمكن مدرستوهاش قبل كدة في الكلية بس هتلاقى

بعض الموضوعات في الماده دية خدت عنها فكرة قبل كدة

يعنى ف بداية المنهج هتدرس حالة المائع وهو ساكن

طبعا كلمة مائع تعنى سوائل او غازات وفى هذا الجزء

هتدرس بعض الخواص المتعلقه بحالة المائع

وهو ساكن زى الكثافة وspecific weight و

specific gravity وهتدرس الsurface tension

وهتدرس اللزوجة وهي خاصيه تصف المائع وهو فى

حالة حركة وهتدرس بعض اجهزه لقياس ضغط المائع

زى manometer اللي خدناه فى ثانوية عامة واجهزة

اخري وهتدرس ايضا تاثير القوى الهيدرواستاتك على

الأسطح المستوية والاسطح المغمورة فى المائع وقوى الطفو عليها

Archimedes principalولكن هذا الجزء

ادرس فىمجموعة من ال3 مجاميع

لأن الماده دية كان بردو فيها نفس مشكلة الثرمو كان ليها

اكتر من دكتور وكل مجموعه ليها دكتور لو حصل نفس المشكلة

دية معاكم حاول ان تحضر مع المجموعة اللى بيديها دكتور

السمنودى ود/محمود كمال لان شرحهم بجد حلو قوى ولو معرفتش

تنظم جدولك ان تحضر معاهم علي الاقل صور محاضرتهم من حد

بيحضر معاهم وبيكتب معاهم كويس انا بتكلم على أسوأ

الظروف ولو حصل نفس اللي حصل معانا وان شاء الله

يبقى نفس الدكاترة اللي بتدى الدفعه كلها

المادة من 150 درجة 90 فاينال و 30 شفوى

و20 ميد ترم و10 اعمال سنة

بالنسبة للدراسة

المنهج تقريبا من 8 شباتر :
1.fluid static
2.Elementry fluid dynamic
3.Fluid kinamatic
4.Flnlte ontrol volume
5.similitude
6.viscous flow in pipes
7.Compressible flow
8.Flow over immersed bodies

ولو عايز تاخد فكرة عن كل شابتر ممكن ترجع للمرجع

و هتلاقيه في جزء الفلود في المكتبة بتاعت قسم ميكانيكا

بالنسبة للمذاكرة

انا فى الأول ذاكرت من المرجع ولكن بعد كدة ذاكرت

من الورق بس وفوت محاضرات علشان انا مكنتش مع

دكتور محمود كمال و د/السمنودى وده طبعا مش صح بس

فعلا الجزء الاول اللي ذاكرته من المرجع وسالت فى اللى

مكنتش فهماه فعلا استفدت علشان كدة احضر المحاضرة اى

كان الدكتور وحاول ذاكر من المرجع واسأل الدكاترة والمعيدين

فى اى حاجة مش فهمها وتجيب محاضرات د/السمنودى

و د/محمود لو مدوش مجموعتك وبكدة نبأة اكلمنها عن

مواد الترم الاول اللى هتمتحنها الترم الاول

و فاضل الديزاين والثيورى

عايزة اقولك حاجة متدخلش جامد اوووى وحاول تستعد

لسنة تانية بس متنساش انك في اجازة علشان تقدر تواصل

السنة كلها يعنى حاول تكون متوازن ادى الشغل حقه

ووقت الترفيه حقه لان سنة تانية عايزة تركيز وعدم توتر

عشان تقدر تكمل وفعلا لما هتستعد ليها هترتاح نفسيا

وانت داخل سنة تانية ومتدخلش بكل قوتك من الأول

عشان متجيش على الترم التاني وتلاقى نفسك مش قادر

تشتغل الترم التانى اتمني يكون وصلك قصدى

[AhmedKashifSchrodinger]

الديزاين والثيورى المشكله فيهم انك هتلاقي كتير من اللي حولك بيرعبك منهم و يقولولك ان كتير بيشلها وانهم مواد صعبه اووي طيب مش اول مدخلتوا سنه اولي كان في ناس بتقلقك من الماتيريال وانها صعبه بس اكيد بعد ما درستها و حولت تفهم وتابعت فيها بلمذاكره اكيد وجدت انها ماده رائعه جدا وان شاء الله تكونوا حلاتوا فيها كويس هو مينفعش اقارن الديزاين والثيورى بلماتيريل لان دكاترة الماتيريال كنا بنقدر نفهم منهم لكن د/احمد حسين دكتور الديزاين كنت معظم الوقت مش بقدر افهمه لانه ما شاء الله فكره عالي اووووي بس كان هدفي من المقارنه ان منخدش كلام الناس كده علطول ونفضل راعبين نفسنا من المواد ديه لان فعلا امتحاناتها جت كويسه غير ماكنا متوقعين
( ويا رب اعدي منهم) وفي نفس الوقت هما مش مواد سهله هما مواد تقيله ومحتاجه شغل طول السنه ولازم تبقي قلقان منهم شويه علشان متستهنش بيهم بس مش لدرجة الرعب
6.الثيورى:
الماده زي مقولت هي ماده ممتده وهيديها دكتورين د/حسام هيديكوا الترم الاول وفي بداية الترم التاني ودكتور تاني هيدخل بعده
الماده من 200 درجه (120 فاينال و20 ميد ترم اول وده هتمتحنونه في جزء الدكتور حسام في بداية الترم التاني و20 ميد ترم تاني علي الجزء المتبقي من المنهج و20 اعمال سنه علي الحضور و الغياب و حل الشيتات والحل بيبقي في ورق A4 )
بلنسبه للدراسه في الترم الاول:
هتخدوا 3 شباتر كل شابتر عليه شيت
شابتر (1):هتخدوا فيه بعض تعريفات والفرق بين mechanism , machine وهتخدوا بعض ميكانيزمات وازاي تحسبلها degree of freedom يعني تعرف الميكانزم له كام حركه قد يكون الميكانيزم ثابت غي مكانه زي الstructure او يكون بيعمل حركه محكومه واحده زي ميكانيزم الحركه التردديه للتمساح في المكشطه النطاحه
شابتر (2):هتخدوا فيه ازاي تحسبوا velocity and acceleration لاي لينك في الميكانيزم
شابتر(3):هتخدوا فيه القوي المؤثره علي الميكانيزم وكيفية حساب ردود الافعال لاي للينك
مهم طبعا حضور المحاضرات والسكاشن
بلنسبه للمذكره:
من المحاضره والسكشن ويفضل تحضر سكاشن م/تامر حسن لانه منظم اوي وشرحه في السكشن زي الكورس وطبعا تحل الشيت بايدك باكامل وحاول تجيب ورق مرجعات م/تامر من اول السنه لان بيبقي فيه مسائل الامتحانات السابقه وبيقي فيه افكار اصعب من الشيت
بانسبه للديزاين انا مش هعرف اتكلم عنه كويس بس لو دخلت علي ميكانيكا Design هتلاقي موضوع بيوضح الشغل ماشى ازاي في الديزاين

[AhmedKashifSchrodinger]

أنا هشرحلك يا بشمهندسة ولاى حد عايز يعرف حوار موضوع الديزاين من الالف للياء
فى الملخص ده

اولا هتشترى الشيت وتشترى كل الشيتات اللى تنزلك
فى الشيت الموجود حاليا فى المكتبه المشروع
الدكتور بيعمل الاتى
بينزلك جهاز معين
جهاز ميكانيكى معروف بالنسبه له ومعروف وظيفته وبينزل رسمه واحده عن الجهاز ده واسمه
انتى تاخد الرسمه وتاخد الاسم تدخل على جوجل او اى محرك بحث
تجيبى صور للجهاز ده فعليا وانت عارف مسبقا شكل مقاطعه من الورق وعرفت ايه وظيفته
تفضلى وراه على المواقع تجيب صور للجهاز ده ويفضل صور للمقاطع بتاعته وهتلاقى ان شاء الله بس ركزى وانتى بتبحث علشان توصلى للنتايج بسرعه
بعد كده بتشوف اقرب رسمه منهم لرسمة الدكتور لانها مش زيها بالظبط
بعدين تجيبها للبشمهندس المره الجايه او انت من نفسك ترسميها علطول بايدك ةده اول سكشن
وبايدك يعنى بمثلث او مسطره وتصغريها يادوب تبقى فى الاسكتش ومترسميش مسقطين
هو مسقط واحد مجمع للرسمه دى
وتروحى للمعيد
يشوف ويصحح ويديك بونس ويقول تعديلات وتجيله المره الجايه عاملة التعديلات ويشوف ويصحح وهكذا لفتره من الزمن
بعدين يقول لكل مجموعه اختاروا من بين رسوماتكم لان كل واحد من المجموعه بيعمل رسمه لوحده
تختار المجموعه افضل رسمه
ثم يبتدوا يفصصوها باللفظ كده
الجهاز ده بيبقى اجزاء استندرد يعنى ورده او صاموله او مسمار او اى جزء معروف مقاساته عالميا
واجزاء مش استندرد زى الجسم الخارجى والاجزاء الداخليه وخلافه
بالنسبه للرسم على اللوح
بيطلب مننا حاجتين فى الموضوع ده
حاجه اسمها construction وده يعنى رسمه للمجسم ككل مجمع ودى تو دى وبترسمله مسقطين يوضحوه واللوحه دى مهمه جدا جدا
الحاجه الثانيه اسمها working drawing وده انك تفكك الرسمه لاجزاء
الاجزاء الاستاندرد اللى عندك مش هتترسم ده مبدا امشى عليه
بالنسبه للورق اى جزء استندرد فى ال working drawing ولا يرسم
ترسمى بقيه الاجزاء كل جزء لوحده تماما فى لوحه ترسميه مسقطين ومعمول فيهم مقطع ولو ترسمى معاهم مجسم له يكون احسن وتحطى كل الابعاد عليه
وال fits & tolerence وده هناخده وبسيط
كده تمام رسمنا ال construvtion و ال working drawing
نيجى للرسم ببرامج الكاد عموما
inventor autocad solidworks
ارسمى بالبرنامج اللى يعجبك ويريحك بس المهم تطلع شغل وانا بحبذ الانفنتور
المهم
ترسمى كل جزء برضه تو دى بابعاده وتطبعى صورته
وترسمى بقى ثرى دى للمجسم ده ككل بكل شى فيه
يفضل يكون حد معاكى بيعرف فى الشغل ده علشان متتعبوش وتسلموا شغل نظيف
وتدخلى الاستنادرد من البرنامج نفسه
وتقدمى برضه رسمه تو دى للكونستركشن من خلال البرنامج
وتعمله brochore يعنى كانك عاملة فعلا منتج وبتسوقيه
دى كل النقاط الاساسيه بالنسبه للمشروع وبيتلم فى الاخر فى دوسيه ويتسلم
بقيه النقاط بسيطه جدا هتعرفيها مع الوقت ومش يعنى هتاثر على اللى قولته

[AhmedKashifSchrodinger]

تقريبا البشمهندس قال كل حاجه عن شغل الديزاين بس انا هضيف شوية حاجات بلنسبه للشرح والسكاشن كانت ماشيه ازاي انا بصراحه مكنتش بفهم في المحاضره اوي وساعات مش بفهم خالص وسكاشن كنت بحس اني تائهه وانا خدت كورس في الديزاين مع م/ايمن الكينج وبصراحه اقدرت افهم منه الديزاين لانه بيدا معانا من الاول كان ناس كتير خدت كورس ومنهم طلبة تقديرات بس برده حتي لو خدت كورس حاول انك تستفيد من الدكتور وتساله في مكتبه وساعات هتقدر تفهم منه وساعات ممكن متفهمشي اقصده لان زي مقلت د/احمد حسين فكره عالي اوووي وحاول تسال في السكشن بس بصراحه كنت بتلخبط منهم ولو هتسال حد في السكشن يبقي اسال م/عمرو شعبان لان شرحه رائع وهتلاقيه بيقول المعلومه صح زي م/ايمن الكينج
وعلي فكره في ناس قدرت تمشي في الديزاين بدون كورس ولو مختش كورس هتمشى كلاتي حضور المحاضره والسكشن وتجيب ورق م/ايمن من حد بياخد كورس معاه علشان لو في خطأ يبقي متصحح ولو قدرت تاخد كورس يبقي افضل
الماده من 200 درجه (120 فاينال و80 اعمال سنه)
جروب الديزاين يبقي من 6-7 طلاب
ان شاء الله متحتجش تاخد كورس في اي ماده غير الديزاين وممكن تبقي تحضر مراجعات الفاينال في الثيوري مع م/تامر لو لاقيت ورق المراجعه مش واضح بانسبالك بس لو طول السنه بتحضر سكاشن م/تامر ان شاء الله مش تحتاج تاخد كورس

[AhmedKashifSchrodinger]

هوا كده فاضل مواد الترم التاني وهم :
1.الديزاين
2.الثيورى
3.Measure
4.هيت
5.سباكه ولحام
احنا كده خلصنا الديزاين معلش هتكلم عن باقي المواد كمان يومين
بس في حاجه تانيه تحب اضيفها في اي ماده

[AhmedKashifSchrodinger]

Scorpiano

معلش يا بوب اتأخرت عليك .. بص انا مش قريت الكلام اللي فات بس هقولك من عندي وانت قارن بقي ... اولا هبدألك بالترم الاول و بالمواد الرخمة من وجهة نظري

stress : الماده دي من 100 منهم 60 درجة فاينال تمام ... لازم تكون حافظ استركشر اولي صم انا عارف انها مشكله لان الدوك مش اوي بس حاول وركز كويس اوي علي الجزء بتاع الشير والنورمال استرس وده تقريبا اخر جزء عندكم في اولي وهو بداية تانيه .... مشكلة الماده دي ملهاش كتب ولا مرجع او تقريبا المرجع وهمي لان الدكتور بيمشي بمزاجه حته من هنا وحته من هناك فلازم تركز اوي في المحاضرات ونصيحة مني متعتمدش علي الشيتات بتاتا يعني متفرحش انك حليت الشيت لان كل شيت تقريبا اربع مسائل تعبانين فحت وتبص علي الامتحان تلاقي بلاوي يبقي تركز من الاول بعد كل جزء هتاخده في المحاضره انك تبص في الامتحانات القديمة ودي موجوده في مكتبة الكليه .... هو فيه ميزه واحده ودي خاصة بالدكتور انه بيرفع الدرجات بطرريقه كبيره جدا يعني تقريبا مبيشلهاش حد الا اللي مكتبش ولا كلمه انما اللي مشي شويه بيعدي ...

الثرمو : من 200 يعني حوت ... منهم 120 درجه علي الفاينال طبعا لازم برده تراجع علي الفيرست لو كويس جدا والماده متقسمه ل3 اجزاء ... الاول هتاخد السيكند لو والانتروبي وشوية حاجات في اللذيذ الجزأين اللي بعد كده اصعب شوية ... وهما جزء السيكل وجزء الريل جاز .... الثرمو عموما لازم تتذاكر من المرجع ودي افضل طريقه ليها ... هتلاقوا افضل معيدين تتخيلوهم في حياتكم مهندس عاصم ومهندس عمرو... معيدين بجد ربنا يكرمهم مش هيقولولك لأفي اي وقت وهيعملوا مراجعات في الاخر بدون مقابل ... فحاول تسألهم في اي حاجه وخاصة مهندس عاصم علي طول بيمشي بالمرجع وفاهمه جدا .. امتحان الميد تيرم بيبقي سهل تقفله انما الشفوي انت وحظك فيه كده وفيه كده ....

الفلود : من 150 والفايال من 100 وليها شفوي الماده دي وبرده انت وحظك .. مشكلة الماده دي انها كبيره جدا المرجع كبير جدا وصعب جدا انما الدكتور السمنودي بيختار حاجات معيننه يشرحها فحاول تحضر معاه او علي الاقل تصور محاضراته لو مش لقيت وقت لان فيه 3 داتره للفلويد كل واحد في مجموعته لانه بيكتب كل حاجه علي السبوره والامتحان بالظبط من المحاضره معدا مسأله واحده او اتنين بالكتير وبرده مش صعب اوي ... بس المشكله ان الماده صعب تتفهم لان المرجع مينفعش يخلص في شهرين ...

السركتس : من 100 والماده دي انت عارف طبعا دكتور محمود عبد الحميد بينزل كتب تحلها وتتوكل علي الله وانت ونصيبك لو جابلك حاجه منه او لأ لأن السنه بتاعتنا كانت الاسئله غريبه ومش منه نهائي بس مش قدامك حل تاني ....

[AhmedKashifSchrodinger]

Nepton

ثيوري الترم التاني:
هيكمل معاكم د/حسام وهيديكم شابتر (4)وهو عن الكامات وديه اول مره تدرسوها في الشابتر ده هتخدوا كذا نوع من الكامات و كل نوع له معدلاته والدكتور هيستنج معاكم هذه القوانين و ممكن تحفظ القوانين علطول مش لازم يستنتجها ويفضل تبقي عارف الدكتور بدا ازاي علشان لو نسيت القانون في الامتحان الجزء ده هتلاقيه في الشيتات افكاره كويسه بس في الامتحانات هتلاقي ساعات افكار صعبه هنعمل ايه؟ زي مقولنا قبل كده هنجيب ورق المراجعه لل م/تامر من اول مناخد الكامات و نحله بعد منحل الشيتات ونسال في اللي يقف معانا
بعد كده هيدخل دكتور تاني هيكمل معاكم وهيديكم شابترين وهم Gears ,Balancing والجزئين دول سهلين والدكتور بيجيب في الامحتان افكار زي اللي بيقولها في المحاضره
حاول انك تفهم الماده ديه وتسال الدكتور و متحبطش بسرعه مثلا ادخل علي النت واعمل سيرشات في الموضوعات اللي هتاخدها واشوف videos ليها علي النت
لان ديه كانت غلطتي في الماده ديه اني مسعت اكتر عشان افهمها واستسلمت من ان افهمها
بلنسبه للامتحان :
متقلقش مدام حليت شيتات و ورق المرجعات هتحل كويس ان شاء الله لانك هتلاحظ ان الدكاتره بتجيب امتحانات متكرره
بس لما بقول حاول تفهم فده ليك كمهندس

[AhmedKashifSchrodinger]

Heat and mass transfere
الماده ديه فيها بعض الاجزاء كويسه وسهل تمشي فيها وكان فيها اجزاء شويه غلسه وهيديها 4 دكاتره
الماده من 175 درجه (100فاينال و 35 شفوي وتقريبا 25 ميد ترم و15 اعمال سنه)وطبعا الشفوي زي مقولنا في الثرمو
بلنسبه للدراسه:
اولا الدكاتره ممكن تتغير لان السنه اللي قبلينا كان بيديهم دكاتره تنيين والترتيب اللي هتخدوا بيه المنهج ممكن يتغير علشان كده هكلمكوا علي المنهج بصفه عامه و محتواه
الجزء الاكبر من المنهج هيبقي علي الهيت وهتخدوا جزء صغير علي الماس في اخر اسبوع تقريبا نبدا بلهيت وهتاخدوا فيه طرق نقل الحراره وهناك 3 طرق لنقل الحراره وهذه لطرق هي conduction,convetion,radiation وده انتوا ختوا عنها نبذه في فيزيا اعدادي جزء الكوندكشن هتلاقوه اسهل جزء في المنهج والكونفكشن كويس لكن الرادياشن شويه غلس وبعد ما تدرسوا هذا الجزء هتخدوا جزء تطبيقي علي الكلام ده وهو جزء hEAT Exchanger ده جزء كويس وسهل المرجع اللي بشتغلوا منه هو
(Introduction to Heat Transfere by Incropera) علشان لو حبيتوا تتعرفوا علي هذه الموضوعات
جزء الماس جزء اتاخد في الاخر ومخدش حقه بس الدكتور حل معانا شوية مسائل وجاب مساله منهم في الامتحان
بلنسبه للمذاكره:
من المحاضرات و الساكشن والمرجع وحل الشيتات اول باول

[AhmedKashifSchrodinger]

Measure:
الماده ديه كلها اجهزه قياس متعلقه اكتر بPower مشكلتها هيه والماده اللي هتكلم عنها (اللحام والسباكه) ان كتير منا بيسبهم لحد وقت الامتحان ودي غلطتي التانيه بس هحاول اقولكم ازي تتفادوا الخطأ ده
الماده من 125 درجه(75فاينال و 25 علي كتاب المعمل وده هكلمكم عنه لان بنضيع بسببه درجات منناو25 شفوي)
الدراسه:
الماده هيديها دكاتره كتير و بردو بيتغيروا كل السنه عشان كده المنهج فيه اختلاف من سنه لسنه اهم حاجه اقدر اقولهالك ان تحضر كل المحاضرات وتذاكرها ومتكومهاش عليك واي دكتور هينزل ورق تجيبه وتذكره و تسال الدكتور في اي حاجه مش واضحه وابدا مذكرتها من الاول هتقول دا الديزاين والثيوري واخدين كل الوقت دا يدوب اعمل المطلوب مني اسلمه في الديزاين ويتبقي كام ساعه احل فيها شيت الثيوري وبعدان انتي ناسيه انتي مش قولتي ان في بداية الترم التاني عندنا ميد ترم ثيوري انتي شكلك كده عماله تقولنا في حاجات صعب نعملها
ببساطه يبشمهندس هرد عليك و اولك مش احنا اتفقنا ان احنا هنجيب ورق مرجعات الثيوري من اول السنه عشان نتمرن علي الافكار الصعبه وبعدين لو ملحقتش تحل الورق في الترم الاول ادامك اجازة نصف السنه سبنا دلوقتي من اجازة نصف السنه احنا لينا فيها كلام تاني
بص يبشمهندس الماده ممكن تتلم في الاخر وانا بصراحه مذكرتهاش غير 4او5 مرات اثناء الدراسه وكان ادمها 3 ايام قبل الفينال وانا ذكرتها في ليلة الامتحان وحليت حوالي 2/3 الامتحان هتقول منتي ذكرتيها في يوم واحد هقولك يوم زي 3 لاني مجرد بحفظ المعلومه و سمعها في الامتحان وتاني حاجه انا مقتنعه بيها ان ربنا مش هساوي بين حد تعب طول السنه وحد متعبش واخيرا انت لما تذاكر من الاول انت المستفيد لانك هتتعلم في ناس محبطه هتقولك متتعبش نفسك فيها ركز في الباقي بعدين ديه ماده بتتلم في الاخر وهيقولولك مااحنا مش هنفهم حاجه انت مش شايف الشرح عامل ازا ي زي مقولتلك اسعي كتير مره واتنين وعشره ولو لاقيت كل ده ملوش فايده خلاص ركز في الباقي بس بينك وبين نفسك وادام ربنا تبقي حاسس انك سعيت وحاولت تعمل اللي عليك
معلش اني طولت في الكلام ده ومركزتش في محتوي المنهج لانه بينقي سهل وبيتغير شويه عن كل سنه بس هقولك علي حاجه بخصوص المنهج اول حاجه هتدرسوها في المنهج هيبقي فيها جزء proability and least square method فحاول تراجع عليهم
كتاب المعمل
السكشن هيتقسم لمجاميع كل مجموعه هتاخد تجربه والاسبوع اللي بعده هتتابدلوا التجارب وهكذا كل الاسبوع ايه اللي هيحصل في المعمل؟
لمعيد هيشرح التجربه وبعدين هيوريهالكوا لو الجهاز شغال وتاخدوا قريات وترسموا جراف للتجربه وممكن يطلب منكم تعملو بحث عن جزء معين في التجربه وتسلموه الاسبوع اللي بعده طيب ما الكلام جميل ايه بقي اللي بيخلي درجات تقل
كذا سبب
1.ان اناس تعمل اي بحث ومش عارفه هي احطا ايه
2.ان الناس تنقل من بعضها
3.ان الناس اصلا متهتمش بلموضوع وتسلم الكتاب فاضي
طيب احنا المفروض نعمل ايه ؟
1.يفضل ان تقرا التجربه قبل متحضر المعمل وانت هيبقي عندك جدول في كتاب لمعمل تعرف منه التجربه اللي عليك ولو كنت خدت المحاضره اللي متعلق موضوعها بلتجربه يفضل تقرها عشلن تقدر تستفيد من المعمل وتتناقش مع المعيد (لو مقدرتش خلاص بس النقطه ديه علشان تساعدك علي الفهم يعني مش هتاثر علي الدرجة )
2.في نفس اليوم اعمل اللي اطلب منك علشان حاجتين
*تكون لسه فاكر اللي خدته
*يبقي ادامك فرصه تسال المعدين لو معرفتش تعمل حاجه
3.اخر تجربه خالص اللي هي اكبر تجربه هتلاقوا فيها 7 حاجات ديه اهم تجربه ومعظم الناس نقلتها هما المعدين هيدوك قبل متسلمها حواالي 3او 4 اسابيع في هيقولولك اسبوعين بس بعد كده هيقولولك خليها لمل نلم الكتاب يعني هيبقي ادامكقبلها فرصه كويسه علشان تعملها طيب هنعمل كلاتي في التجربه ديه ناخد جزء ونحاول نعمله وتسال المعيد اللي شرحالك حتي تفهم ازاي هتعملها وهكذا في باقي الاجزاء يعني متخليش اي تجربه في الكتاب الا وانت متاكد من الحل الموجود فيها والاجابات اللي انت كاتبها
4.السيرشات اللي تتعمل احاول اطبع حاجات متعلقه بلمطلوب وتكون اريها وفاهم اللي موجود فيها علشان تقدر تحطها في الكتاب
بكده ان شاء الله تاخد درجه كويسه في لكتاب ولو حد نقصك تقدر تطالب بحقك لان بذلت مجهود وانت اول باول بتسالهم لوعايزينك تحسن حاجه في الكتاب او تعدل حاجه

[AhmedKashifSchrodinger]

اللحام والسباكه:
الماده ديه زي مقولت هي مشتركه مع الميجر انها بتتذاكر مره علي الميد ترم ومره قبل الفاينال وده بجد مينفعشي خلاص في الماده ديه وخصوصا لو عايز تدخل انتاج وحتي لو باور منت عندك ديزاين في تالته فلازم تبقي عارف شوية حاجات في السباكه واللحام وطبعا بتاع انتاج لازم يعرف انوه مش هيخودهم تاني لا في تلته ولا رابعه انما اكيد هيستخدمهم في شغله سواء في الكليه و بعد التخرجا نا مش عارفه اوصفلوكم مدي الندم الي انا فيه لاني متعلمتهمش وبكده هتطر افهمهم لوحدي ومش عارفه ان كنت هفهم ولا لا انا مش هكلمكم هنا عن محتاواهم العلمي لانكم ختوا جزء عنهم في اعدادي بس هالوكم ازاي تتصرفوا التصرف الصح لعمل مشروع السباكه
الاول هألوكم المشكله والخطأ اللي عملته في المادتين دول وازاي انتم تتفادوا هذا الخطأ
نبدأ بللحام اولا الدكتور كان بيشرح بالprojector وكان بيشرح كم كبير وكان رتم سريع صحيح بيعيد الحاجه بس طرف واحد بيتكلم ديه اول محاضره جيت المحاضرة التانيه ففضلت ان احضر محاضرة حراريه وافوت اللحام منا كده كده مش هفهم وبعدين رجعت واظبت علي الحضور والدكتور قال انو هينزل ملزمه فيها كل اللي بشرحه فكنتمعتمده علي ان لما الملزمه هتبقي فيايدي هذاكر واسال في اللي مش فهماه واتابع اول باول اعدنا اسبوع ومنزلتش واسوع تاني واسبوع ورا اسبوع ونزلت قبل الميد ترم باسبوع كان الدكتور مشي فيها كتير وانا مكنش بحضر محاضره لان مش معاي حاجه اتابع منها وطبعا انا عارفه اني مش هلحأ الم اللي خدناه في اللحام فخلاص اختصرت الطريق والدكتور كان محدد الامتحان هيجيذاكرت كده شويتحاجات بسيطه وحفظت شوية اسئله ودخلت الامتحان وحليت
طب انا كده ابقا غلطانه طب وانا مالي منا كان نيتي اني اتابع اما ينزل الكتاب)
طبعا غلطانه لاني مكلفتش نفسي اني ادور علي اي مرجع اشتغل منه (طب وكنت اجيب المرجع منان) كنتي خشي علي موقع الكليه وخشي علي course description شوفي الماده اللي انتي عايزاها وشوفي اسماء المراجع بتاعتها ويبقي اعملي سيرش عن المرجع ديه او انزلي اشتيريها او كنتي اطلبي من الدكتور انك تصوري الslide لحد ما الكتاب ينزل يعني اللي عايز يتصرف بيتصرف
ان شاء الله تتفادوا الخطأ ده ولو الكتب اتاخرت عليكم اطلبوها من حد اكبر منكم وياريت اللي قدر يلاقي كتاب د/احمد سالم الصباغ في اللحام يبقي يخليه للاطلاع منه لاني اعتقد انه هيبقي كتاب رائع
هكمل ان شاء الله معاكم السباكه
وبكده هنكون عرفن تقربا فكره عن كل ماده في تانيه ميكانيكا والاسلوب الامثل امذاكره بس ممكن وقت التنفيذ منقدرش نعمله فهحاول ابأه اربط المواد ببعضه وامتي امسسك الماده ديه وامتي هسبيها

[AhmedKashifSchrodinger]

السباكه:
الماده ديه لو خدت حقها من الدكاتره والطلبه سعت فيها شويه اكيد هتتفهم بس الماده فيها عاملين يخلونا منفهمهاش صح
العامل الاول:الدكاتره ازاي ؟ هقولكم الماده هيديها دكتورين الدكتور اللي هيدخلوكم في الاول هو د/محمد طه الدكتور من الناحيه العمليه كويس جدا واشتغل بايده في مصانع كتير وخبرته كبيره في السباكه بس من الناحيه الاكاديميه مش بنقدر نحصل حاجه منه في المحاضره وبعدين المحاضرات مكنتشي ماشيه بsquence صح المهم وانت عمال تسال حد اكبر منك عملتوا ايه مع د/محمد طه دا احنا ضيعين ومش فاهمين حاجه هيقلولك اصبر شويه انتم هيدخلوكم بعد كده د/طارق موسي وهيظبتكوا في الماده ديه قلنا ماشى ادينا مستنين د/طارق عشان نفهم (بداية الخطأ) وفعلا دخلنا د/طارق موسي بعد مدكتور طه ادانا 6او 7 محاضرات يعني شهرونصف وانتا في ضياع تام والمعلومات اللي عندك في الماده ديه من السكشن والسكشن مكنش بيغطي اللي اتقال في المحاضره
طيب ما خلاص دخل د/طارق والدنيا هتبقي وردي وهنفهم اقولكم بقي اللي حصل اول ما دخل الدكتور اشتغل بprojector وطبعا في فرق شاسع في الشرح وكان وسط مابشرح عمال يسالنا ومكناش بنرد وكان شايف الوجوم على وجوهنا قال اه طبعا ماهو من سهر الديزاين وسايبن السباكه ويتعصب علينا مفيش محاضره دخلها الا وهوا مخنوق منا ومش طايق يشرح طبعا من بعد المحاضره الاولي كنت خلاص علي اخري ومتضايقه جدا لاني حسيت ان ببني ماده علي خطأ د/طارق شرحه كويس بس ميعرف ان احنا اصلا مش فاهمين حاجه علشان نجاوب عليه بس الحقيقه انو كان عارف ان احنا مش فاهمين حاجه وده اللي ضيقني اكتر وبرده مكنش معانا حاجه نذاكر منها لان الكتاب نزل متاخر زي اللحام يعني الدنيا ضلمت خالص بس في ناس هتقولك د/طارق ظبطنا والامتحان جه كويس وجاب المساله اللي قال عليها في المحاضره ماشي انا معاهم عرفنا نحل في الامتحان
بس بجد مش فهمنا سباكه المفروض ان السباكه تتربط بلماتيريال اللي درسناه لانهم جزئين مينفصلوش عن بعض يمكن يكون نبرة الاحباط واليأس متملكاني دلوقتي بس فعلا حزينه اني مفهمتش الماده ديه يمكن خلاص تقولوا انتي واجعه دمغنا ليه منتي قولتي ان الامتحان بيجي كويس والدكتره بتظبطنا وتقولنا عل اللي بيجي في الامتحان بس ايه فيدة انك تحل الامتحان وتعدي من الماده وتخلص وتلاقي نفسك مش فاهم ماده مهمه زي ده وخصوصا لمهندس انتاج
العامل التاني :احنا الطلبه لما بنلاقي الظروف ديه بنستسلم ونقول المهم نعدي من الماده بسلام
طيب المفروض نعمل ايه ؟
هقترح عليكم شوية حاجات تعملوه ولعلها تجي نتيجه كويسه
1.اول د/طه يدخلوكم حولوا تكتبوا معاه ولونزل ورق علي الجزء بتاعه تجبوه وتذكروا منه وتجيبوا الكتاب من الاول ولو هتاخر تتصرفوا تتطلبوه من حد اكبر منكم واللي تلاقوه مش واضح روحوا واسالوا د/طه بصراحه لما هتسالوه في مكتبه ممكن متفهموش اوي حولوا كذه مره ومش معاه بس روحوا كمان لدكتور طارق من الاول روحوا للمعدين يعني حولوا مع اكتر من حد من اول الترم عشان متجيش بعد شهر تلاقي الموضوع اتكوم وعندك ديزاين وثيورى فتتطر تعمل زي مكتير عمل وتسبهم للاخر
2.في حاجه اسمها مشروع سباكه وهي منتج بتعمله نموذج وحسابات لعمل فتحة الصب وفتحة التهويه والفروض عشان المشروع يكمل انك تنفذ النموذج وتصب الدرجه الاساسه على عمل الحسابات فقط انم النموذج والصب فدول بونص بصو بقي من اول ما الترم يبد اسالوا د/طارق ود/طه هنشتغل منيين المشروع ولما تعرفوا هتختاروا منتج معين تعملوه ونتوا ماشين بترتيب المنهج كل حاجه تخدوها تروحوا تنفذوها علي المشروع يعني مثل اول حاجه هتدرسوها هو عمل اي تعديلات في المنتج حتي يمكن سبكه وده يعتبر مهم جدا للديزين والجزء ده احنا متعلمناهوش اوي فحاول انك تشوف اكتر من منتج وتسال هل المنج ده محتاجات تعديلات حتي يمكن صبه اسال الدكاتره والمعدين اعمل سيرشات عل النت علي الموضوع ده بصراحه انا معملتش حاجه زي ديه بس جرب يمكن تلاقي حاجات كويسه وعد متفهم روح طبق عل المشروع بتاعك بعد كده هتاخد ازاي تعمل نموذج وحسابات القوي اللي علي cope and core وبعد كده حسابات فتحة الصب وفتحة التغذيه في كل جزء من الاجزاء دول اول اول تروح تنفذ في لمشروع بتاعك بعد كده لو حبيت تعمل النموذج عشان تصبا انا من رائي انك لو صبات صب صبتن الصبه الاولانه تخليها زي ماهي منغير ماتعملها ماشيننج وتشوف العيوب اللي حصلت في الصبه وتحلل اسباب هذه العيوب ز الصبه التانيه اعملها ماشيننج عشان تشوف اذا كان في عيوب تحت السطح ولا لا
اكيد لو عملت كده ان شا الله هتفهم الماده ديه

[AhmedKashifSchrodinger]

كده بقي تقريبا عندنا فكره عن تانيه ميكانيكا
بس عندي كام نقطه كده عايزه اوضحها
1.كان في اكتر من ماده قولت ياريت لو تراجعوا شوية حاجات فيها هل افضل نبداها دلوقتي ولا لما تبدا الدراسه ؟
ديه ترجع لكل واحد منكم في اللي بيحب يبدا في الدراسه بس لازم يكون بيقدر ينجز بسرعه عشان يدخل في مود الدراسه
في واحد بيحب يبدا من دلوقت عشان يدخل مرتاح ويكربس نفسه في الدراسه وانا بفضل هذا الرأي لانه نشط دماغه من دلوقتي وميبأش داخل الدراسه وياخد وقت علي ميفتكر بس لو بدأ من دلوقتي مينساش انه في اجازه ويبدأ براحته وميدخلش جامد يعني كأنك بتسخن عشان الماتش
لان فعلا سنه تانيه والسنين اللي بعدها محتاجه طول نفس ومتجيش علي النص وتتعب
2.احنا قولنا ان في جروب ديزاين ياريت لو تعرفوا تعملوا جروب مع بعضكم من دلوقتي الجروب لازم هيكون من نفس السكشن هتقولوا مااحنا منعرفش مين هيبقي مع بعضه في السكشن انا قصدي اعملوا جروب مؤقت دلوقتي في الاجازه واشتغلوا مع بعض
هنشتغل في ايه؟
احنا مش قولنا ان في شوية مواد ممكن نراجع عليها وايلالكم علي المراجع بتعتها اشتغلوا مع بعض وشجعوا بعض وحاولوا بصوا شويه في المرجع واللي يقدر يفهم حاجه يوصل اللي فهمه لغيره شوفوا كده هتعرفوا تشتغلوا في جروب
وعلي العموم حتي لو معرفتوش تعملوا جروب دلوقتي بس لما تبدا الدراسه وتعملوا جروب حاولوا انكم تساعدوا بعض وتفهموا بعض
معلش هكملكم علي بليل ان شاء الله

[AhmedKashifSchrodinger]

Scorpiano

الاقتصاد الهندسي : ماده من وجهة نظري من المواد المهمه اللي هتقابلها في دراستك حاول تحضر لها محاضرات علي قد ما تقدر وهينزل شيتات حاول تحلها الاول بنفسك معرفتش روح للمعيدين مع انهم مش ... بس حاول برده وبعد كده هينزل حلهم وفيه شوية غلطات لانه تقريبا نفس الورق بينزل كل سنة ومش الاقتصاد بس اللي هتلاقي فيه غلطات ده تقريبا كل المواد بلا استثناء وهتسمع التريقه دي من الدكاتره بس برده مش قدامك غيره وانت اللي هتعرف تطلع الغلط لو فهمت ....... الماده دي بتتكلم عن انك ازاي تعمل مشروع وتدرسه بطريقه اقتصادية هندسيا يعني انك لو معاك جنية النهارده وجيت بكره معاك جنيه برده يبقي انت كده خسرت .. كمان ازاي تقارن بين مشروعين مدتهم محدده او غير محدده وايهما افضل لك من حيث المكسب ....

الثيوري :

الترم الاول هيكلمك عموما يعني ايه ثيوري وهي عباره عن ميكانيزمات بتتم وتعرف ازاي تتم هقولك مثال انت عارفه لو تفتكر في المقشطه عندكم في اولي اخدتم ان شوط الرجوع اسرع من شوط القشط طب ده بيتم ازاي من جوه !!!!! ده اللي هتعرفه بالتفصيل الممل ... بعد جزء الميكانيزم هتاخد ازاي تعين السرعات والعجلات والقوي والعزوم المؤثره علي اي ميكانيزم ودول بيتم تعيينهم عن طريق رسومات بمبادئ معينه تشبه قليلا الاسقاط الهندسي بتاع اعدادي وكمان فيه حاجه انت اخدتها اللي هي مركز الدوران اللحظي وازاي تعين منه السرعه حاول تراجع علي الجزئية دي .... هتاخد في كل شابتر حاجه كده غريبه ملهاش دعوه بيه مثلا هتاخد حاجه اسمها هوك جوينت ودي عباره عن عمودين متوصلين مع بعض بشوكه من طرفي العمودين ودي وظيفتها نقل الحركه ودي واضحة اوي لو شفت عمود الكردان بتاع العربيه بياخد سرعته اساسا من الفتيس عن طريق وصله هوك ....وهتاخد حاجه اسمها الفلاي وييل ودي اسمها بالبلدي كده الحدافة ودي بتعمل حاجتين اننها بتعمل اتزان في الماينة اللي بتدخل فيها ودي موجوده في اي ماكينه في الدنيا وكمان ليها وظيفه مهمه انها بتخزن بعض من الطاقه الزايده جواها عشان ممكن تعمل بيها وظيفة تانيه وانت هتدرس ازاي تعين الطاقه المختزنه اللي جواها دي .... بعد كده هتدرس البالانس وازاي تعمل اتزان لنظام ميكانيكي معين او تعرف هل النظام ده متزن ولا لأ ؟؟؟؟
وبعد كده هتدرس الكامات ودي من اصعب الاجزاء اللي هتدرسها ودي تذاكرها اخر حاجه و تحلها اخر سؤال في الامتحان لانه بييجي معقد جدا ودي وظيفتها الاساسية انها بتحول الحركه الدورانيه لحركه خطية هقولك مثال تخيل بيضه وحاطط ايدك عليها من فوق ولف البيضه دي بايدك التانيه هتلاقي ايدك اللي فوق مشيت علي خط مستقيم عمودي وهتلاقي البيضه بتلف ... البيضه دي هي الكامه بقي مع اختلاف اشكالها مربعه مدوره وهكذا ... وهتاخد تطبيق حي علي الكلام ده وهو محرك العربيه فيه حاجه اسمها عمود الكامات ده عباره عن عمود وعليه شوية كامات بتتحكم في صمام دخول الوقود وصمام خروج العادم والعمود ده بيلف عن طريق عمود الكرنك ومتوصلين بترس او سير مع بعضهم .... بعد كده هتاخد التروس وشوية حسابات عنهم وازاي تحدد عدد سنان الترس وده من المواضيع السهله والشيقه جدا ...

[AhmedKashifSchrodinger]

عموما الكلام اللى تقال ده احسن كلام واحب اضيف ان الكورسات مش حاجه اساسيه بل ليست لها لازمه فى بعض المواد وان المحاضرات والمتابعه فى المرجع او الورق اللى بينزله الدكتور ومع الدكتور وانك تسأل الى مش فهمه افضل بكتير من الكورس زى مواد الميجير واللحام والسباكه ومواد الثرمو و الهيت والاقتصاد والفلويد وفى (الثيورى كقايه جدا مراجعات فى النهايه وحضور السكشن والمحاضره من البدايه طبعا

[AhmedKashifSchrodinger]

مع بداية الدراسه عايزين نبقي ماسكين كل المواد اول باول مع اول محاضرة ديزاين هتلاقوا الدكتور بيكلمكم عن المشروع اللي هتنفذوه واول سكشن هيألوكم عن الشغل هيبقي ماشى ازاي انكم تعملوا جروبس اول حاجه هتعملوها ف المشروع انكم هتعملوا سرشات عن المشروع وتعملوا روبرت عنه يعني مميزاته وعيوبه وكيفية العمل ده هيطلب في تاني اسبوع تقريبا بعد اول سكشن تخدوه علشان منستناش لحد اخر لحظه و ممكن منلاقيش اللي عازينه عن الجهاز وبعدين احنا عندنا مواد تانيه هقولكم علي حاجه تعملوها في بداية اي مشروع تخدوه لما تجي تعمل سرش عن المشروع حدد ساعه مثلا كل يوم او يومين وانت بتعمل سيرش ممكن تلاقي حاجه متعلقه بلمشروع هتسيفها مش شرط تقرأها بتركز اوي وهتعمل كده لحد متلاقي بأه عندك حاجات كتير عن المشروع في وقت ميطلب منك اي حاجه هترجع للحاجات ديه وتقراها بتركيز فكده مش هتضيع وقت علشان تعمل سيرش وبعدان لما هيطلب منك Brochure هتقدر ترجع للحاجات ديه وبعدن ف جروب الدزاين حاولوا تحددوا يوم تتجمعوا فيه ومتخلوش الديزاين تاكل الوقت منكم علشان باقي المواد نجيه للثيوري طبعا هتبعوا مع الدكتور والسكشن بلنسبه للشيت هو بيتطلب بعد كام سكشن فلو مكنتش بتحل اوا باول في الشيت هتلاقيه اتكوم عليك فتتطر في اليوم اللي قبل تسليمه تقضيه في حل الشيت وبلطبع مش هتذاكر المواد اللي خدتها في اليوم ده فمثلا انت عارف انك هتسلم الشيت كمان اسبوعين فحدد لنفسك ساعه او ساعتين يحل فيها ثوري ومتنساش انك بعد متحل لشيت انك تحل شويه في ورق المراجعه لان فعلا مسائل الثيوري بتاخد وقت في الحل ومسالة الوقت قولنا ازاي هنسرع بس مش هنحل المساله بوقت من اول السنه ده مش يبقي شغلك في المرحله الاولي انما هنعمل كده علي الشهر اللي اقبل الامتحان في بعض المواد نجي نقي للثرمو اول جزء في المنهج هيبقي مراجعه علي ثرمو اولي وده مش هياخد منكم وقت لنكم هتبأو مرجعين يعني هتدخلوا علي حل الشيت علطول وان شاء الله هيحصل نفس الكلام في السترس يعني اللي هتبأو حسينه جديد عليكم هو الفلود و الاقتصاد بس لو ذكرتوهم اول باول وسألتوا مش هتلاقوا مشكله والسيركت نفس نظام اولي
4.بعد شهر ونصف هتنزل امتحانات الميد ترم هتلاقي نفسك سيبت الثيورى وهتركز في باقي المواد اللي هتمتحنها وان شاء الله لو عملت اللي قولت عليه في النقطه اللي فاتت هتلاقي نفسك حليت كويس وهتلاقي بتوع الثيورى بيقولولكوا عندكوا امتحان في السكشن بعد اسبوع من الميد ترمات فلو حليت الشيتات وشوفت ورق المراجعه هتحل كويس وفي خلال الاسبوع ده هتلاقي نفسك بتذاكر ثيورى متسبش بقي باقي المواد علي الاقل تقرأ المحاضرات
5.من بعد الميد ترم هتلاقي المواد شدت وممكن تلاقي نفسك مش اقادر تمسك كل المواد فتقوم جي علي الاقتصاد وعلي الشيت الاخير اللي في الثيورى او بمعني اصح مش هتركز علي شابتر (3) بص مش مشكله لو سبت الاقتصاد شويه بس علي الاقل اقرأ المحاضره (والافضل ان تذاكر لو قدرت) بانسبه لشابنر (3) في الثيوري لو لاقت نفسك الوقت مش مكفيك تعمل نفس اللي اقولنا عليه علي الاقل اول متاخد سكشن ترجع البيت تحل مسأله او اتنين في ورق A4 بحيث ان البشمهندس بعد 3 او 4 سكاشن هتلاقيه بيألوكم سلموا شيت (3) فيكون معاك جاهز لان فعلا في الوقت ده هتلاقي كذا حاجه عليك وهتبقي عايز تستعد للمواد اللي هتمتحن فيها والله واعلم يمكن يخلوا امتحان ترم للثيوري

[AhmedKashifSchrodinger]

بعد شهر ونصف هتنزل امتحانات الميد ترم هتلاقي نفسك سيبت الثيورى وهتركز في باقي المواد اللي هتمتحنها وان شاء الله لو عملت اللي قولت عليه في النقطه اللي فاتت هتلاقي نفسك حليت كويس وهتلاقي بتوع الثيورى بيقولولكوا عندكوا امتحان في السكشن بعد اسبوع من الميد ترمات فلو حليت الشيتات وشوفت ورق المراجعه هتحل كويس وفي خلال الاسبوع ده هتلاقي نفسك بتذاكر ثيورى متسبش بقي باقي المواد علي الاقل تقرأ المحاضرات
5.من بعد الميد ترم هتلاقي المواد شدت وممكن تلاقي نفسك مش اقادر تمسك كل المواد فتقوم جي علي الاقتصاد وعلي الشيت الاخير اللي في الثيورى او بمعني اصح مش هتركز علي شابتر (3) بص مش مشكله لو سبت الاقتصاد شويه بس علي الاقل اقرأ المحاضره (والافضل ان تذاكر لو قدرت) بانسبه لشابنر (3) في الثيوري لو لاقت نفسك الوقت مش مكفيك تعمل نفس اللي اقولنا عليه علي الاقل اول متاخد سكشن ترجع البيت تحل مسأله او اتنين في ورق A4 بحيث ان البشمهندس بعد 3 او 4 سكاشن هتلاقيه بيألوكم سلموا شيت (3) فيكون معاك جاهز لان فعلا في الوقت ده هتلاقي كذا حاجه عليك وهتبقي عايز تستعد للمواد اللي هتمتحن فيها والله واعلم يمكن يخلوا امتحان ترم للثيوري

استكمالا للنقطه (5)لم تيجيبوا في المرحله ديه وتحسوا ان المواد تقلت اوي حاولوا لو لاقيتوا فرصه تروحوا بيها عن نفسكم استغلوها يعني قضوا يوم بعيد عن الدراسه علشان تقدروا تكملوا في اليوم ده متفكروش في المذاكره وادوا العب حقه بس ده امتي ده لو انت ماشي من اول السنه جد وبتذاكر مش تبقي بادئ براحه ومش تذاكر وتقول ادي اللعب حقه اه ادي العب حقه لما اكون مدي الدراسه حقها
6.بداية من الفتره ديه هتحاول وانت بتذاكر تشوف الامتحانات وتبدأ تشوف وانت بتحل بتاخد وقت اد ايه وتحاول تسرع في الحل احنا طول الترم اللي يبقي شغلنا ان نفهم ومش بنقي مركزين علي نقطة الوقت انما في مرحلة ما قبل الامتحان لازم ناخد بلنا من النقطه دي
7.خلاص فاضل اسبوعين علي الامتحانات اسبوع هتحاول تلم فيه المواد قبل متسبها استعدادا لاول امتحان في الاسبوع ده خلاص هتتساب الثيوري والديزاين ويقعدوا شهر وحاجه منفتهمش اهم حاجه اقدر اقولهلكم ونتو بتذكرو للامتحان انكم تخصصوا في اسبوع المذاكره لكل ماده 3 او 6 ساعات بحيث تحلوا امتحان كامل بوقت اد زمن الامتحان نفسه وحاولو تحلوا اكتر من واحد لحد متلاقي ان انت بتخلص قبل الوقت لان الامتحان نفسه ليه رهبته فلو اتعود تحل وتخلص في اقل من الوقت المعطي هتجد نفسك بتلحأ ان شاء الله تخلص الامتحان كله وبلاش تدخلوا الامتحان وحطين في دماخكم ان عمرنا منخلص الامتحان لان لنا بتحطوا ده في اعتبركم بتحلوا اقل مما كنتم تتوقعوا اه ممكن يخلص الامتحان ومتلحش تخلص بس ده متوقف عليك هل انت اتمرنت كتير ولا لا
8.الحمد لله عدت الامتحانات علي خير وان شاء الله تحلوا كويس وادينا خدنا اجازه نص السنه قبل مقول اللي علينا نعمله لازم لازم لازم تخدوا علي الاقل 4 او 5 ايام اجازه واللي عايز يكملها اسبوع يكمل بس متكتروش عن كده لسه ورانا حاجات بس في الاجازه ديه لا تقولوا ثيورى ولا ديزاين واللي يكلمك فيهم علطول تقوم عامل كده ]
نبدا الشغل طبعا احنا دخلنا علي شهر ونص سايبن الثيوري والديزاين وعارفين بعد تقرييا شهر من الترم التاني د/حسام هيعملنا ميد ترم
ايه بتقولي شهر طب متسيبينا نكملبطلوا لعب و كسل بقي شكلكوا عايزين تقعوا في الخطأ اللي وقعنافيه ناسين الميجر واللحام والسباكه وخصوصا واني بقولكم ان انتوا اللي هتجروا ورا الدكاتره كتير علشان تفهموا
بصوا بقي بلنسبه للثيوري هتلاقوا نفسكم ناسين شويه وفي منكم اللي مذكرش شابتر (3) وفي اللي مذكرش الماده ديه خالص هقولكم علي اسلين وكل واحد يختار الاسلوب اللي يريحه
1.انك تذكر لوحدك من الشيتات وورق المرجعات والمرادي هتذاكر كويس بحيث انك هتخش علي الترم التاني وتبدا البدايه اللي قولناها في نقطه (1) مع الاخذ في الاعتبار اللي قولناه في السباكه وااللحام والميجر
2.انك تشتغل في جروب وليكن جروب الدزاين اللي انتوا عملينه وهتلاقي منكم اللي مش فاهم حاجه واللي فاهم شويه واللي كان متابع شجعوا بعضيكم وحددوا حاجات تذكروها اولا اللي فاهم هيقول وانا مستفاد ايه هقولك يابشمهندس اللي فاهم لما بيجي يشرح حاجه لحد المعلومه بتثبت في دماغه وبعدين بيقي في مناقشه يعني ممكن اللي مش فاهم يسالك سؤال متعرفش اجابته فتخلي معاك الاسئله ديه لبداية الترم عشان تسال فيها بجانب ده كله ثوانك عند ربنا يعني مستفاد من كله دنيا واخره واللي مش فاهم استفاد بانه فهم هببدأ الحقد بقي منت لو كنت ذكرت شويه كان زمانك انت اللي خدت الثواب
بلنسبه للديزان هتقعدوا تشتغلوا في المشروع التاني
10.بداية الترم التاني من اول الترم اي فرصه هتخرجكم بره الدراسه انتهيزوها لان الترم ده اشد من الترم الاول ونعمل زي مقولنا قبل كده ونمشي فى كل المواد والثيوري مش نبقي شايلين همها لاننا استعدادنا ليها فبتالي ده هيخلينا نركز ف كل المواد
بعد شهر هتمتحنوا ميد ترم الثيوري وبعدها باسبوع هتطلع نتيجة الترم الاول وان شاء الله تبقي كويسه وبعدها باسبوع او اكتر امتحان الميد ترمات وهيبقي للهيت والسباكه واللحام مفيش ميد ترم ميجر ومفيش حد هيمتحنكوا فيها لغايت الفاينال وده بيبقي السبب في تركها فمعلش حاولوا في الزنقه ديه تمسكوها ولو حتي قرايه وبعد شهر اواكتر هتلاق نفسك داخل علي الفينال وهنعمل نفس الاستعدادت اللي قولناها في الترم الاول بس مش هنعرف نعملها قوي في الميجر لان المنهج بيتغر بس ده ميمنعش ان احنا نبص علي امتحانات وبلتوفيق
بكده انا قولت كل اللي عندي واتمني ان تتفادوا الاخطأء اللي وقعنا فيها

[AhmedKashifSchrodinger]

بص يبشمهندس مفيش مانع انك تذاكر من الملازم بس ساعات بيبقي في اخطأء وبعدان لازم تتعود شويه ان تذاكر من المرجع هوا ده بيبقي صعب في الاول ومش كل لمواد هتتذاكر من المرجع ده بعض المواد زي الثرمو والهيت ومرجع الفلود بص فيه شويه مع متابعة المحاضره وبعدين في مواد هتلاقي الدكتره هتنزلها كتاب او ملازم ففي الحاله ديه هتذاكر من الكتب وملازم الدكتره بلنسبه للثيوري انت بتجيب حل الشيتات ل م/تامر عشان تتاكد من الحل

[Eng.Sam]

معلم .. كاشف :)

انت الوحيد اللي تعرف تعمل حاجة زي كدا من التوبيكات ..

تسلم ايدك يا جميل ..

هقراها بمزاجي بقا باليل :) ..

[AhmedKashifSchrodinger]

تحت أمرك يا زعيم

بس دا لسة عاوز تظبيطات كتير انا حذوقه كدا

و اخليه زى العروسة من دلوقتى ان شاء الله

و لو عاوزنى احط بتاع سنة أولى برضو قولى

دا لسة عندى فى ال Backup مضاعش

[النهضة]

إيه المعلومات الجامدة دية؟

جزاكم الله خيرا وربنا يوفقنا في سنة تانية دية

[Shatla]

جامد يا كاشف

[Mostafa 007]

جدع يا كاشف :)

[3la2 2l_Din]

هبقى أقرأه على رواقة
تشكر يا كاشف و شكرا لجميع جنود تانية أقصد تالتة اللي بيساعدونا:)

[asdo]

شكراااااااااااااااااااا

[hadi]

شكرا يا هندسة
فعلا مهم جدا انك تبقى فاهم الدنيا ماشية ازاي
احسن مالواحد يبقى عامل زي البطيخة مش فاهم اي حاجة
ربنا يباركلك

[Bim Bim]

جزاك الله كل خير

[som3aa]

الف شكر يا باشا

[mema2006]

تمام جدا جزاكم الله خيرا

بجد موضوع مهم جدااا و مفيد شخصيا فادني في حجات كثيرة و كل ما بقراءة بستفاد منه أكثر

[AhmedKashifSchrodinger]

معلش لسة بظبط فى التوبيك و فى ردود لازم تتمسح

دا مليان اكواد بايظة و عاوز يتذوق زى اول رد كدا

[Shiko]

عاش يا كاشف

[said]

توبيك بجد تحفه لامم كل حاجه

بسمش فاضل غير ان احنا نبتدي صح بقا ونبطل كسل و انتخه

[النهضة]

الشرح جميل جدا

يا ريت كده لو توضبه توضيبه واضحة ومختصرة وتحتها في التوبيك الرئيسي للموضوع

[AhmedKashifSchrodinger]

الحقنى انا لسة مش عارف احرر الردود :(

و كمان فى رد فى الصفحة دى عاوز يتمسح يا

ريت تمسحه يا عبد الرحمن

[أبو العباس]

السلام عليكم



سؤال _شرط ان جروب الديزاين يكون من نفس السكشن ولا لأ ؟؟؟؟

[النهضة]

الحقنى انا لسة مش عارف احرر الردود :(

و كمان فى رد فى الصفحة دى عاوز يتمسح يا

ريت تمسحه يا عبد الرحمن

تمام يا كاشف

علم بكرة في الكلية لما نتقابل هنحاول نحل المشكلة مع بعضينا

[hadi]

جزاك الله كل خير

[AhmedKashifSchrodinger]

كتبت هنا عشان التوبيك يطلع فوق و الناس

تشوفه و تجهز نفسها للترم التانى مش بلعب فى العفار ^^

بس اهو احسن ما اكبيره كله تانى مفيش وقت نهائى

و ربنا يوفقكم

[3la2 2l_Din]

ده الكلام بتاع الدفعة اللي قبلنا
أنا قولت أنشط الموضوع علشان لو حد حابب يشوفه