نصائح من أهل باور الى اهل تانية (سابقاً)

[كريم كامل]

السلام عليكم ورحمه الله وبركاته
ازيكو يا شباب تانيه سابقا , ايه اخبار النتيجه معاكوا ؟؟؟؟؟
المهم انا في الموضوع ده حبيت أحط خلاصه خبرتى مع قسم باور باعتبار أنى خلاص باذن الله بكالورويس باور:z3rt:khrbai:
1_ خلى بالك ان قسم باور من الأقسام اللى صعب تجيب فيها تقدير بسهوله بمعنى اى قسم تانى تقدر تجيب فيه تقدير أعلى من التقدير اللى انتا جبته في تانيه بمراحل لكن في باور صعب تعلى عن التقدير اللى جبته ( بالعكس أنتا ممكن تقل عنه ودى المأساة اللى انا عشتها السنادى :petlya35ch::petlya35ch::petlya35ch:)ولو عليت بيكون التغيير في الدرجات يعنى زيادة بسيطه في درجاتك عن تانيه لكن مش هتتنقل لتقدير تانى فنصيحه الناس اللى محتارة في أى قسم وعايزة تجيب تقدير تخش اى قسم غير باور انا أعرف ناس شخصيا كانت جايبه في تانيه مقبول وجابت في تالته جيد جدا وكمان ناس كانت طالعه تالته ب3 مواد (طبعا الأقتصاد كان مادة منهم ) والحمد لله جابوا في تالته سيارات جيد بنسبه 72 % انا مش قصدى انى اخوفكم:nar::nar: من باور انا بعرفكم اللى فيها والنظام بيمشى ازاى . انا مكنش في حد قالى اى حاجه عن باور بس دخلتها عشان انا بحب قسم باو:victory::c:ر مهما كان التقدير اللى هجيبه والحمد لله مش ندمان انا سعيد جدا :khrbai::khrbai:
2_ اذا قررت انك تخش باور خلى بالك أن فيه حاجه اسمها مواد اختياريه دى بيكون في مادتين انتا بتختار ماده منهم ونصيحه منى مش تختار المادة السهله اللى كله بيعدى فيها اختار المادة اللى انتا حاسس أنك هتفهم منها( لو كانت المادة االسهله أوكيه )يعنى بمعنى اصح تختار الدكتور مش تختار الماددة لان الماده ممكن تكون سهله جدا بس أنتا مش بتفهم من الدكتور وممكن تكون الماده رخمه بس أنتا بتفهم وحاسس أن في حاجه جديدة بتضاف لمعلوماتك وانك مستمع بالمادة غالبا انتوا هتلاقوا مواد الدفعه كلها دخلت فيها وفي مواد تانيه عدد صغير اوى أختارها المهم انتا أختار الدكتور اللى انتا تفهم منه وترتاح في الشرح معاها انا في الترم الأول عملت زى ما انا بقول مع ان المادة اللى اخترتها كانت ماتيرال مع الدكتور / طارق موسى والحمد لله استفدت كتير اوى من المادة وجبت فيها أمتياز , اما في الترم التانى مشيت مع الناس وسمعت كلامهم وجبت فيها مقبول فالمهم اختار الدكتور مش المادة
زى ما المثل الشعبى بيقول (اختار الصديق قبل الطريق والجار قبل الدار )
طبعا عرفتوا مين الصديق ومين الطريق ومين الجار ومين الدار .
3_ أهم حاجه وانتا في باور ذاكر كل المحاضرات:b5oor: مش تذاكر الشيت وتحل امتحانات بس(انتا لازم تذاكر المحاضرات لانى بيجى منها الأمتحان ) لان الأمتحان بيجى في المنهج كله مش من امتحانات السنين اللى فاتت انا جربت الكلام ده في مادتين وحليت امتحانات السنين( مش معنى ذلك انك متحلش امتحانات السنين اللى فاتت , لا حل امتحانات السنين اللى فاتت ذااكر المحاضرا وخلبى بالك من الأثباتات والنظرى اللى في المحاضرات ) اللى فاتت والحمد لله دخلت لاقيت الأمتحان من المحاضرات وفيه اجزاء نظرى مكنتش بتيجى قبل كده( وللدكتور كان قالها في المحاضرة بالنص )بمعنى اصح اوعى تنشن وكمان ذاكر المنهج كله كله كله كله كله كله كله كله كله
متقولش مثلا الحته دي مش هيجيى فيها سؤال( والله هتلاقيها تانى يوم في ورقه الأسئله وحصلت معايا في مادتين )كل حاجه متوقعه ما دام انتا دخلت باور

وأخيرا احب أقولكوا اتمتعوا بأجازتكو وافرحوا بالنتيجه وقبل ما تغيرأى تعديل في الرغبات صلى صلاة استخارة واستخير ربنا أكيد ربنا هيدلك على اللى فيه خير ليك وعلى مصلحتك أكتر من أى حد لان ربنا أعلم بيك من اى حد
ولو انتا بتحب قسم باور هتخشه أكيد مش هيفرق معاك التقدير والحاجات ديه انا بقول كده س عشان الناس كلها بتكون خارجه من تانيه والتقدير بتاعهم واقع وعايزين يرفعوا التقدير عشان يكون التقدير العام حلو
وباذن الله قبل بدايه الدراسه هبقى أكتب ملخص عام عن كل مادة وازاى تتعامل معاها
معلش أنا طولت عليكم بس اتمنى انى اكون افدتكم
ولا تنسونى من صالح دعائكم *

[النابغة الذبيانى]

جزاك الله خير
وربنا يوفق الجميع

[mada_89]

حد عايز حاجة power :P

[smart man]

Shokran we rabna ywafa2ak

[3la2 2l_Din]

بعد اذنك يا كريم هدمج الموضوع ده مع الموضوع التاني في مكانه الصحيح(:
اشطه يا كيمو:)

[som3aa]

ياريت يا كريم تتكلم اكتر
من حيث المواد
وايه المواد اللى هنحس اننا بنفهم
واننا مهندسين وايه المواد التيت وكده يعنى

[3la2 2l_Din]

أه ياريت يا كيمو تفصيل أكتر(:

[كريم كامل]

بعد اذنك يا كريم هدمج الموضوع ده مع الموضوع التاني في مكانه الصحيح(:
اشطه يا كيمو:)
ادمج براحتك يا عم ولا يهمك :c:

[كريم كامل]

السلام عليكم ورحمه الله وبركاته
تالته باور مفيهاش مواد ممتده بمعنى ان الترم بيخلص بسلطاته ببابا غنوجه كل ترم عليه:P 750 درجه يعنى اللى بيروح عمره ما هيرجع ولا بالطبل البلدى عشان كده السنه عايزة مذاكرة من اول يوم كل ترم فيه 6 مواد
انا دلوقتى هكلمكم عن مواد الترم الأول
1- انشاء الأت وتصميم معدات ميكانيكيه ( desgin )
المادة من 175 درجه ( 125 قاينال , 50 امتحان ميدتيرم ومشاريع وتقارير بيطلبها الدكتور وغياب سكاشن واحيانا محاضرات )
الماده بتتكلم عن power transmission أنتوا كنتو خدتوا حاجه زى كده في تانيه اسمها الكابلينج , هتكملوا في تالته على الكلام ده وهتاخدوا حاجه اسمها الكلتش والسيور وهتاخدوا انواع السيور وتعرف ازاى تصمم سير عشان ينقل باور معينه وكمان هتاخدوا التروس اللى هى اهم حاجه في المنهج وهتاخدوا انواعها المختلفه وازاى تصمم ترس وتطلع الماتريال بتاعته بناءا على الباور اللى المفروض هو ينقلها وطبعا الامنتحان بيكون رسم وحسابات مفيش تفضيل للرسم عن الحسابات يعنى لازم هترسم وتحسب
المادة بيديها الدكتور هشام سنبل وهو من افضل الدكاترة اللى عجبونى في انتاج بس أهم حاجه اوعى تفوت محاضرة الدكتور كان بيجي المحاضرة الأولى يوم الخميس الساعه تمانيه وروبع يعنى قبل المحاضرة عقبال ما يشغل الداتا شو بتكون تمانيه ونص واوعى انك تغيب محاضرة بجد مهما كانت المحاضرة عشان الدكتور لو خد الغياب ولقى أنك كنت غايب هتشيل لو حتى مقفل فاينال وميدتيرم والله العظيم انا بيتكلم بجد والدكتور عايز يربى فيه حب الالتزام بس مش عشان حاجه يعنى مش بيعلمك مادة علميه وبس لا بيديك ما هو أبعد من المادة العمليه ( متغبش الا في الحالات القصوى لا قدر الله وفاة شخص من اقاربك من الدرجه الأولى بس ولو الدكتور خد غياب تروحله وتقوله وتوريله الورق اللى يثبت كده انا بتكلم بجد يا جماعه ) عشان الدكتور بيجى ياخد الغياب في محاضرة عشوائيه ( السنه اللى فاتت خد الغياب يوم الخميس اللى كان بعد ماتش السودان اللى خسرنا فيه:c::c: ) والميزة اللى فى الماده ان كل طالب بيعمل المشروع لوحده يعنى مفيش موضوع الجروب ده وكمان كان بيدنا في السكشن البشمهندس ايمن الكنج( وبجد البشمهندس تعب معانا كتير اوى في السكشن وكان متعاون معانا جدا على اد ما يقدر )وكان بيخش معاه البشمهندس عمرو شعبان
كمان المادة شرحها غير تانيه ( يعنى مش هتحتاج كورس ) ممكن تحتاج بس تصور مراجعه فاينال او مراجعه ميدتيرم والامتحان 3 ساعات مش اربع ساعات وسؤال واحد بيجيب ( جير بوكس _ صندوف تروس _ ويقولك صممه ) أو ممكن يديك معلومات عن الماشين ويقولك شوف هتركب ماتور الباور بتاعته كام والمحاضرة كافيه جدا جدا جدا جدا , وهتلاقى عندك كتابين واحد للشرح والتانى داتا شيت في أهم الجداول الاستندارد اللى هتاجها في الدراسه وكمان في ملزمه فيها التمارين اللى هتاخدها مش كل التمارين هتحلها هو بيككون حوالى خمس تمارين بس والدكتور بيختارهم وبينزل خطه بمواعيد التسليم والتصحيح للتمارين ده( ولازم تلتزم بالخطه ديه )باقى التمارين حاول تتدرب عليها لو عندك وقت زياده وكمان هتلاقى الدكتور متعاون معاك اكتر وبينزل حلول امتحانات الفاينال للاعوام السابقه( بيكون الدكتور حالل الامتحان بايده عشان تعرف هو عايزك تحل أزاى ) في ملزمه بتنزل بعد الميدتيرم وطبعا اى كتب للدكتور هشام هتجيبها من مكتبه هاشم اللى جبت منها كتاب ولوح الرسم بتاع اعدادى وبجد اسلوب الدكتور هيعجبكوا جدا جدا جدا وانتا هتحب الماده عشان اسلوب الدكتور وكمان لو ربنا موفقكش في امتحان الميدتيرم وحليت حته غلط بس الباقى صح وانتا مسلم التمارين ودرجاتك حلوة فيها الدكتور بيراعى كده وبيديك الدرجه اللى انتا فعلا تستحقها ولو غلطت في الفاينال في الحسابات بيمشى معاك على الغلط وبكمل لو لاقك دى بس الغلطه اللى عندك بينقصك عليها لكن مش بيلغى الدرجه كلها
وكمان خلى بالك الامتحان سؤال واحد ولازم تكون متدرب عليه كويس وباذن الله هتكون مادة التقدير عندكو
وكمان الدكتور طلب مننا تقرير عشن اللى عايز يحسن اعمال سنه يعنى هو كان حاجه أختياريه
انا الحمد لله اعتمدت على المحاضرة والسكشن بس وجبت جيد جدا من 81 %
معلش انا طولت عليكو في الماده دى بس عشان بجد دى احب مادة ليا والفضل يرجع لربنا وللدكتور هشام سنبل اللى حبيت الماده عشانه
وخلى بالك الماده هتكون محاضرة ونص يوم الخميس والدكتور لو هيدى المحاضرة التانيه هيبقى يقول وكمان السكاشن سكشنين في الاسبوع وده ممكن يحطك تحت ضغط في التسيلم بس زى ما بقولكوا متاخفوش البشمهندس ايمن بجد ربنا يكرمه هيكون متعاون معاك جدا ومش هيحب انه يضغطتك

[أبو العباس]

السلام عليكم ورحمة الله وبركاته

طيب مافيش حاجة عن انتاج ولا اية .....؟؟؟:^^::^^:

[كريم كامل]

2- منشأت حراريه ( thermal plants )
الماده 100 درجه ( 70 فاينال , 30 ميدتيرم وسكاشن وتقارير وشيتات )
الماده بتتكلم عموما عن اى منشا في طاقه حراريه يعنى مش على محطات الطاقه الكهربيه بس ممكن يكون المنشا الحرارى كده في اى حته زى مثلا مصانع النسيج والكرتون وغلايات اللبن يعنى بتتكلم في أى حاجه فيها حرارة والكلام ده هيبقى ياكد عليه الدكتور
المهم الماده بيديها دكتورين
1-الأستاذ الدكتور محمد رفعت ( رئيس قسم هندسة القوى الميكانيكيه )
وهيتكلم معاكوا عن رانكين سايكل والبرايتون سايكل وهيكون عليها شيت وكمان هيتكلم عن معالجه المياه في محطات القوى الكهربيه وعن شويه مواضيع متفرقه وكمان هيتكلم عن التربينات البخاريه والدكتور سؤاله بيكون من المحاضرات وساعات بياخد غياب من المحاضرة بس ساعات بيتاخر عن ميعاد المحاضرة عشان هو بيجى على محاضرات قليله ( بسم الله ما شاء الله شغله برا كتير ربنا يكرمه ) والجزء بتاعه ممكن يجى فيه نظرى زى ما حصل السنه اللى فاتت جيه كله نظرى مع ان الجزء بتاعه كان فيه مساءل على السايكلز وكده بس هو حر في الامتحان فانتا زاكر كل حاجه واوعى تقول الحته دى ممكن متجيش وهتلاحظ كمان ان الدكتور وهو بيشرح مش بيبص في ورق عشان هو صمم الحاجات دى فى شغل كتير وبجد اسلوب الدكتور هيعجبك اوى وهو ممكن يكون سريع شويه في الشرح
2- الدكتور اشرف قطب : هيتكلم معاكوا عن الفقودات اللى بتحصل في الغلايه وازاى تحسب الكفاء بتاعت الغلايه (والفقودات هتكون عباره عن قوانين كتير وارقامها رخمه والدكتور هيطلب حفظها منك وممكن يجيبها مساله مباشرة في الميدتيرم فأهم حاجه الناس تعرف منه هل القوانين حفظ ولا لأ )وكمان عن انواع الغلايات والحسابات الحراريه الخاصه بيها ( هى بالظبط تطبيق على قوانين الثيرمو والهيت ) وكمان هيديكوا برج التبريد ( اللى هو بيبرد المايه بتاعت المكثف في حاله عدم وجود نهر او بحيرة صناعيه بجوار محطه الكهربا زى اللى موجود في المحله في المحله ورا الاستاد) وكمان هتاخدوا المكثف والحسابات بتاعته
والماده يعتبر مفيش فيها اى جديد خالص عن تانيه تعتبر تطبيق للأساسيات اللى انتا خدتها في تانيه في التيرمو والهيت بس زى ما قلت خلى بالكوا عشان ممكن الفاينال يجى فيه اى حاجه الدكتور قالها فيا ريت تذاكروا كل حاجه بالذات في المواد اللى تبع قسم باور
وكمان هيكون معاكوا البشمهندس هانى في السيكشن وممكن يعمل كويز في اى وقت وسكشن الماده دى معدودة على الايد في السنه وكمان ايضا معاكوا البشمهندس محمد حمدى ( غنى عن التعريف طبعا حبيب الملايين وبجد الراجل ده هيكون متعاون معاكوا جدا جدا جدا مش بس في الثيرمل لا في مواد تانيه كتير وهيقولكوا على المواد الرخمه وتعمل فيها ايه بجد البشمهندس دا أكتر من الأخ ومش يتخير عن البشمهندس عاصم وبجد اوحش حاجه في تالته باور أن البشمهندس عاصم مش بيدى فيها اى ماده بس برده البشمهندس محمد حمدى موجود وزي البشمهندس عاصم بالظبط )
امتحان الميدتيرم بيكون choose ولو هتحتاج الجداول او خريطه البخار هيبقى يقولك هاتها وخلى بالك الامتحان بيمكون كذا نموذج عشان الناس اللى بتحب تشغل الارسال في الامتحان خلى بالك يعنى تغش من اللى معاه نفس النموذج بتاعك عشان متلبسشى في الحيط دل لو عرفت تغش الامتحان بيكون فيه دكتور وخمس او ست معيدين وخلى بالك من الارقام عشان ممكن يكون الكتور حاطط رقم غلط او وحدة غلط قصد عشان اللى فابق هو اللى ياخد باله واعتقد انك بعد تانيه بقيت تاخد بالك من الرقام صح ولا غلط
طبعا الورق تجيبه من برا من الكشك اللى بعد كشك عم حسنى اللى برا ناحيه الباب اللى عند الجامع في أنسه هناك عارف كل اللى انتا عايز تجيبه وهتفضل تجيب من الكشك ده لحد التخرج باذن الله وهتلاقى ورق كذا معيد انتا تختار المعيد اللى بترتاح لشرحه
وكمان استمرارا لمسيرة الوقوف بجوار الطالب عشان ميشيلش الماده لو درجاتك وحشه في الميدتيرم الدكتور بيطلب تقرير عن مثلا معالجه الميه وبيزل اعلان بالكلام ده في معمل الميجر

[كريم كامل]

السلام عليكم ورحمة الله وبركاته

طيب مافيش حاجة عن انتاج ولا اية .....؟؟؟:^^::^^:
لا النمرة غلط يا حبوب :lol::lol::lol::lol::lol:
أحنا هنا باور وبس
روح على قسم انتاج واسال البشمهندس أسامه الفارس
واكيد هيكون متعاون معاكوا كتير جدا جدا جدا
وابقى سلملى على حبيب قلبى أسامه

[أبو العباس]

لا النمرة غلط يا حبوب :lol::lol::lol::lol::lol:
أحنا هنا باور وبس
روح على قسم انتاج واسال البشمهندس أسامه الفارس
واكيد هيكون متعاون معاكوا كتير جدا جدا جدا
وابقى سلملى على حبيب قلبى أسامه

:^^::^^:

طيب بجد انا مش عارف اعمل الموضوع فين في القسم القديم اللي طبعا مش ظاهلا عندي؟؟؟
ولا في الجديد ؟؟؟..اقصد دة
http://www.h3sonline.com/forums/forumdisplay.php?f=542

[كريم كامل]

:^^::^^:

طيب بجد انا مش عارف اعمل الموضوع فين في القسم القديم اللي طبعا مش ظاهلا عندي؟؟؟
ولا في الجديد ؟؟؟..اقصد دة
http://www.h3sonline.com/forums/forumdisplay.php?f=542
بص خش أعمل الموضوع عند الناس بتوع انتاج يعنى الناس اللى داخله رابعه انتاج واكيد حد منهم هيرد
اكيد اسامه مجهز برنامج لحاجه زى كده

[كريم كامل]

3- الأت موائع (1) : (1 turbomachines)
الماده من 150 درجه ( 20 ميدتيرم , 30 شفوى , 10 كويزات وغياب سكاشن وتقاير معامل ,90 فاينال )
الماده منقسمه الى جزاين
1 - الجزء الأول : الطلمبات ( pumps) : والجزء ده بيتكلم عن المعدات اللى بتستهلك طاقه وطبعا هيكو ن الكلام كله منصب على الموائع الغير قابله للانضغاط ( عشان فى رابعه هتاخد معدات الموائع القابله للانضغاط ) وبيتكلم عن تصميم الطلمبات المركزيه وكذلك منحنيات الاداء بتاعها ودى حاجه هتحاجها جامد لو نزلت في اى موقع في طلمبات عشان توصيل الطلمبات ( دى حاجه تحس بيها انك مهندس وحاجه تنفيذيه ومحدش يفهم فيها غير مهندس باور او واحد مهندس رى عشان سؤالك يا سمعه ) والجزء ده هيديه الكتور أحمد الباز وهتاخد بعد كده الطلمبات موجبه الازاحه ودى هيكون عليها سكشن مجمع المعيد هيقول الافكار بتاعت الجزء ده الموجوده في الشيت والجزء ده هيديه الدكتور نبيل عبد العزيز , وهتعرف نوع طلمبه الزيت اللى في العربيه وحاجات كتيرة تانى وهتحس ان مجالك دايس في كل حاجه خاصه بعد ما تخد مادة المحاركات في الترم التانى هتحس انك خريج باور وسيارات معا ( 2 *1 ) زى الشامبو البلسم :P:lol:وكمان هتاخد معمل في أول السنه وتعرف يعنى ايه تربوماشين وهتلاقى انها استكمال لمادة الفلويد اللى انتا خدتها في تانيه (الدكتور أحمد مش بياخد غياب لكن الدكتور نبيل ممكن ميدخلش ناس متأخرة في اول محاضرة ليه كارت ارهاب يعنى لكن بعد كده عادى) وخلى بالك الدكتور احمد ليه شيتين بس بس شيتين على حق ربنا كل شيت منهم حوالى 30 مساله ولامم افكار كتيرة في الشيت ويفضل انك تحل في الجزء ده بايدك ومش تحل بطريقه صح
2- الجزء التانى : التربينات المائيه : وده بيتكلم عن معدات الموائع اللى بتولد طاقه بس زى ما قلت الموائع الغير قابله للانضغاط بيدى الجزء ده الدكتور قداح وخلى بالك عشان الدكتور بياخد غياب في كل محاضرى بيعدى كشف وتسجل غيابك فلو مش هتيجى ابقى قول حد يكتبك حضور عشان الغياب عنده عليه درجات او بيرفع بيه الناس اللى واقعه في الماده و في المحاضرة هتحس ان الناس بترغى فيها بس لازم تحضرها عشان الغياب والدكتور هيكون شغال بالداتا شو وهيكون في مندوب لكل سكشن يلم الفلوس من الناس عشان يجيب الورق مرة واحدة عشان يكون مع الدفعه وقت المحاضرة والجزء بتاعه سهل جدا وأسئلته معروفه وبتتكرر ومكن تقفل الجزء بتاعه
امتحان الميدتيرم بيكون choose بس بيكون كل جزء في ورقه لوحدها يعنى بيوزع الأول ورق الطلمبات وبعد كده يلمه بعد ما تحل ويوزع بعد كده ورق التربينات وبيكون كل ورقه عليها 10 درجات
طبعا الورق موجود بره في كشك المنار اللى قلت عليه وجيب ورق المعيد اللى انتا بترتاح ليه بس انا من رأيى جيب ورق البشمهندس اشرف مصطفى والكلام ده عن تجربه واى حلول مسائل ينزلها البشمهندس محمد ياسر طبعا وهتلاقى البشمهندس محمد ياسر متعاون معاكوا جدا وشرحه ممتاز ولو شايف أنكو محتاجين سكاشن مجمعه مش هيتاخر بجد ربنا يكرمه
المعيدين : البشنمهندس محمد ياسر وبشمهندس تانى مش فاكر اسمه
الشفوى مبكونش فيس تو فيس بيكون ورقه فيها اسئله بتتوزع عليك وانتا بتحلها وبرده كل جزء ليه الورقه بتاعته وتتوزع وبعديها يلمها ويوزع ورق الجزء التانى
وعايز اقولكو نصيحه في جزء منحنيات الأداء حل المسأله بايدك عشان فيها رسم وخطوط كتيرة ولازم تتعود على أفكارها وكمان خلى بالك من المعمل عشان السنه اللى فاتت جت حته في سؤال الفاينال بيكون ارسم رسمه محابس معينه كنا شوفناها في المعمل والمعيد شرحها
فخلى بالك ما دام الماده تبع باور زاكر كل حاجه واكتب كل حاجه سواء كنت في المعمل او في السكشن أو في المحاضرة
وكمان في الفاينال بيكون كل جزء عليه 45 درجه بس المرة دى بتستلم ورقه فيها الجزأين مع بعض وتعيش مع نفسك طول ال3ساعات بتوع الأمتحان
الماده ليها محاضرتين وسكشن كل اسبوع ولو فيه معمل المعيد هيبقى يقول وساعات ممكن يكون نص السكشن عنده معمل والنص التانى عنده سكشن على حس ما المعيد هيقول

[elmaystro]

مش عارف اقولك ايه يا بشمهندس
ربنا يكرمك ويوفقك

[كريم كامل]

مش عارف اقولك ايه يا بشمهندس
ربنا يكرمك ويوفقك
لا شكر على واجب يا بشمهندس
دى خدمه لاخوانا اللى هيخشوا باور وانا تحت امركوا في أى حاجه عايزين تعرفوها
وادعيلى اخش المشروع اللى انا عايزه عشان هزعل اوى لو مدخلتوش بسبب تنسيق المشاريع

[كريم كامل]

4- احتراق ( combustion)
الماده من 150 درجه ( 30شفوى , 30 اعمال سنه وتقارير وامتحان ميدتيرم لو في امتحان ميدتيرم , 90 درجه فاينال )
الماده دى انا مش هقدر اقولكو على كل حاجه فيها زى اللمواد اللى فاتت لانى مكنتش بحب انى ازاكرها وكمان انا جايب فيها مقبول على 4 درجات لكن انا هقولكوا على اللى اعرفه
المادة ليها محاضرتين وسكشن او معمل (على حسب ) كل اسبوع
بتاخد في البدايه يعنى ايه احتراق وازاى تكتب معادله الاحتراق وتحسب الطاقه اللى بتطلع من احتراق وقود معين وانهى اللى احسن احتراق الوقد بالأوكسجين ولا بالهوا وكمان هتاخد انواع الوقود والأتزان الكميائى والتفكك كل الحاجات ديه بتاخدها مع الدكتور مصطفى عبد الخالق
اما مع الدكتور محمود كمال بتاخد أنواع اللهب وشكل اللهب وسرعته وتصميم الburner وكمان احتراق الوقود السائل واحتراق الوقود الصلب ومعدل التفاعل الكميائى والماده ديه مكنش فيه اهتمام بيها في الكليه بصراحه والواحد مكنش بيزاكرها كتير واتمنى ان يكون في اهتمام بيها بس الحاجات اللى لازم تعرفها عن الأحتراق هتكون فاهمها وتقدر تحلها عشان كمان هتلاقيها داخله معاك في مادة محركات الاحتراق اللى هتاخدها في الترم التانى
اهم حاجه تسلم المعامل والتقارير اللى مطلوبه منك
ممكن الدكتور مصطفى يعمل أمتحان ميدتيرم وممكن ميعملش على حسب يعنى الدفعه بتاعتنا مكنش ليها امتحان ميدتيرم اما الدفعه اللى قبلينا كان ليها امتحان ميدتيرم
ومحاضرات الدكتور محمود ممكن تحس انك مش بتفهم اوى منها لو مش فاهم حاجه مش تتكسف لا أسال الدكتور مرة واتنين وتلاته لحد ما تفهمها وهو هيساعدك كتير
امتحان الشفوى بتاعها بيكون ورقه فيها سؤال انتا بتحله وبتتلم منك وبتيحدد الدكتور اللى هتمتحجن معاه وتطلع على المكتب بتاع الدكتور هتلاقى الورقه اللى انتا حليت فيها معاه ويبدا يسالك فيها او في اى حاجه في المنهج خلى بالك المادة ديه تبع باور يعنى تبقى مزاكر وفاهم كل حاجه
والامتحان بيكون من الشيت بالنص الدكتور محمود كمال قالنا كده وفعلا وعد فاوفى بس معرفش أنتو هيديكو الدكتور محمود ولا لأ
المعيدين : المهندس ديفيد والمهندس محمد صافى

[elmaystro]

ربنا يكرمك وتخش المشروع اللى انت عايزه ( مبسوط كده )

ويكرم كل بتوع تانية وكل واحد يخش القسم اللى هو عايزه ( علشان محدش يزعل )

[كريم كامل]

5- أدارة مشروعات ( project management*)
المادة من 100 درجه ( 70 فاينال , 30 أمتحان ميدتيرم وساعات بيطل حل مشسائل من الشيت في ريبورت )
الماده دى تبع قسم باور ( اكيد عرفتوا انا قصدى ايه )
الماده بيديها الدكتور / محمد حلمى جبر
بتتكلم عن المشروع ومراحل العمل في المشروع والفرق بين المشروع والprocess وشويه حسابت عن الماريع وحساب وكيفيه تمثيل فترة المشروع وحساب أطول مسار في عمليات المشروع وكيفيه ضغط فترة العمل في المشاريع وتقليل عدد العمال وفيها شغل أحصاء برده عن فتررة المشروع وبعد كده بتاخدوا حاجه اسمها earned value بمعنى انك بتيجى في نص مدة المشروع مثلا وتشوف هل انتا انجزت نص المشروع من حيث الميزينايه الخصصه ليه والوقت وحاجات تانيه هتبقوا تعرفوها
الماده فيها نظرى ومسائل في نظرى كتير اوى وامتحان الميدتيرم بيكون طويل جدا جدا جدا جدا جدا ومش بتقدر أنك تخلصه كله في الساعه بتاعت الأمتحان
امتحان الفاينال بيكون برده طويل وممكن تخلصه اهم حاجه تتعود على السرعه في الحل وتبقى أيدك بتكتب بسرعه في النظرى وتكون فاهم وحافظ اللى بتكتبه في النظرى كويس
بمعنى ان مفيش وقت أنك تفكر في الامتحان ( بجد مفيش وقت لو مش عارف فكرة عديها وخش على اللى بعديها )
وأهم حاجه انك تحضر المحاضرة بالذات المحاضرة اللى بتكون قبل الميدتيرمن ( السنه اللى فاتت كانت المحاضرة يوم الاتنين وكان يوم التلات امتحان ميدتيرم سيرمل وادارة مشروعات:b5oor::b5oor::m::handicap::think: الناس كلها غابت مكنش فيه غير 15 واحد في المحاضرة والمحاضرة كانت الرابعه واللى حضر كان شكله معروف بالنسبه للدكتور دخل الدكتور وعلم على ورقه امتحان الناس اللى حضرت فنصيحه حاول متفوتش محاضرة لو حتى صابح تانى يوم امتحان ميدتيرم )
المعيدين البشمهندس محمد حمدى وبس
كمان البشمهندس ربنا يكرمه عمل مراجعتين قبل الميدتيرم على الجزء بتاع المسائل وعرفنا نزاكر النظرى منين ( ورق البشمهندس حسن ثيرمو) والدكتور بيشرح بالداتا شو وهيبقى يدى الورق لوحد منكو عشان ينزلوا في المكتبه
والورق لو هتجيب ورق جيبه من مكتبه المنار اللى هى الكشسك اللى انا قلت عليه
على فكرة انا الماده ديه فحت نفسى فيها جامد وجبت في الأخر جيد ( 67 مكن 100 ) الحمد لله
مش قولتلكوا دى مادة تبع باور ( مش بخوفكوا بس خلوا بالكوا )

[كريم كامل]

6- مقرر أختيارى (1)
الماده من 75 ( 50 فاينال , 25 اعمال سنه وميدتيرم على حسب لو فيه ميدتيرم ولا لأ)
المادة ديه أسمها اختيارى عشان بيكونوا في مادتين انتا بتختار انك تدرس مادة منهم المادتين هما
1_ مقدمه في الميكاترونيات : ودى معرفش اسم الدكتور اللى بيديها عشان انا كنت واخد الماده التانيه بس بتتكلم عن الحساسات واللوجيك جيتس ( البوابات المنطقيه ) ودى الحاجات اللى انا اعرفها عنها
2_ هندسه المواد ( متقدم ) : والماده ديه بيديها الدكتور طارق موسى وبجد مادة ممتعه وشيق ومهمه جدا لاى مهندس ميكانيكا هيتخرج وكمان هيراجع معاك حاجات انتا خدتها في اولى في الماتريال وهيراجع الدياجرام بتاع الحديد والكربون ودى اهم حاجه انتا هتتطلع بيها من المدام وهيعلمك ازاى تفكر وهيقولك على مكواقف قابلته ايام ما كام هو بيتدرب وهيكلم عن المعالجه الحراريه للمواد وكمان عن المواد المركبه (composite material ) ,وانواعها كمان هيتيح وقت للمناقشه خلال المحاضرة ومكنش فيه امتحان ميدتيرم هو طلب تقريرين بس خلالا الترم وبيكون فيها غياب وبجد المحاضرة مكونتش بحس بوقتها عشان كنت بحب المادة اوى أوى اوى والفاينال بيكون حلو فيها مكرر من العام السابق ومفيش لف ولا دوران
مادة المياتروكنس كان فيها ميدتيرم وهى سهله جحدا وسهل تجيب فيها الأمتياز انتا بس صلى صلاة استخارة وشوف انتا ربنا دلك على انهى مادة ولازم تحدد المادة الأختيارى خلال اول أسبوع في سكرتاريه القسم في أخر دور في مبنر توشكى من عند الباب اللى عند المبنى الجديد تطلع اخر دور وتحد الماده
هتلاقى الدقعه كلها بتختار مادة ميكاترونكس بلس انا نصيححتى ( لا تكن امعه ان أحسن الناس أحسنت وان اسااوا أسات ) حددت المادة اللى انتا عايزها وفى الترم الول الاختيارى سواء اى ماده منهم هتجيب على القل باذن الله جيد جدا
الماده بالنسبه لميكاترونكس مفيش فيها سكاشن اما بالنسبه للماتريال في سكشنين في السنه بس بيكونوا مع المهندس رمضان
ولازم تسلم الشتيتن دول وحلهم بيكون نازل في مكتبه كانون
هتلاقى الورق بتاع مادة الماتيرال اما مادة الميكاترونكس هتلاقى الوره بتاعهتا في كشك المنار
الماده محاضرة واحدة في الاسبوع

[كريم كامل]

كده نبقى أحنا خلصنا - بحمد الله - مواد الترم الأول
نخش على مواد الترم التانى
1- ميكانيكا الأت ( 2) : mechanics of machines
طبعا انا عارف ان الناس اول ما هتشوف اسم الماده ديه هتفتكر الثيورى بتاعت تانيه
هى الماده ملهاش اى علاقه بالثيورى خلاص بتاعت تانيه
الماده من 150 ( 30 امتحان ميدتيرم , 10 درجات غياب في السكاشن , 110 امتحان فاينال )
الماده دى مش تبع قسم باور بس مكتسبه خاصيه باور وهى التقدير القليل
الدكتور / محمد هدايه , المعيد / محمد محمد هدايه
وساعات بيكون في بعض السكاشن الدكتور خطاب والدكتور عادل منيب
الماده بتتكلم عن الاهتزازات التى تحدش لاى منشأ وكيفيه حسابها وكيفيه تقليلها عن طريق استخدام الdamper اللى هو عامل زى المساعد بتاع العربيه وكمان استخدام السوسته وطريقه توصيل السوست وكمان كيفيه كتابه معادله الحركه لاى نظام ميكانيككى يحدث له اهتزاه وهتاخد كمان حساب الديفليكشن والجساءة لاى جسم وكمان السرعه الحرجه التى لا يجب ان يتعداها العمود حتى لا يحدث له كسر
الماده محتاجه حل ومذاكرة كتير وامتحانها بيكون حلو وساعات بيكون بيكون زفت
في السكاشن مفيش شرح الا في سكشنين بالظبط
باقى السكاشن انتا قاعد عمال تحل بايدك في السكشن وتسال الدكتور في الحاجات اللى بتقف أدامك ويا ريت تبقوا تعموا سيكتش تحل فيه مسائل الشيت مبيكونش عليه درجات بس عشان تنظم مذاكرتك قبل امتحان الميدتيرم
وطبعا تجيب ورق البشمهندس ايمن عشان تعرف تسلك في المادة
وفى السنه بتاعتنا كان فيه معمل كان عليه 3 درجات يا ريت الناس مش تفوت الحاجات ديه عشان انتا في الفاينال بالذات في المادة ديه بتضيع درجات كتير اوى
انا عن نفسى ضيعت 32 درجه في الفاينال لوكشه واحدة
المادة محاضرتين في الاسبوع وسكشن

[كريم كامل]

2- محركات الاحتراق الداخلى (2) : internal combustion engines
الماده من 150 ( 90 فاينال , 20 ميدتيرم , 30 شفوى , 10 غياب السكاشن وبونص الشيتات يعنى لو هتحل الشيت قبل السكشن في سيكتش وتوريه للبشمهندس وانتا بتاخد غيابك بيديك درجه عليه والدكتور هيبقى يقولكوا كده )
المادة بيدرسها دكتورين
1 - الدكتور / جمال حنيس : هيديكو المحركات رباعيه والمحركات ثنائيه الأشواط وهيشرح كمان الأحتكاك وكيفيه حسابه في المحركات سؤاء كانت ديزل او بنزين وهتعين كل ده بنفسك في المعمل وكمان هيديكو التزييت وخواص زيت التزييت ودراسه خواص وقود المحركات الديزل والبنزين وحاول تكتب كل كلمه في المحاضرة عشان كل كلمه مهمه جدا جدا جدا بالذات في محاضرات الدكتور جمال وكمان هتاخد معمل في البدايه هتمسكوا محرك عربيه شاهين تفهموا كل حاجه فيه موجوده ليه واسمها ايه وبتعمل ايه واسمها بلغه السوق ايه وكمان في مقطع في محرك مرسيدس موجود في معمل المحركات بجد تحفه تشوف المكبس وهو طالع وحركه الصمامات وكل الشغل ده وجزء الدكتور بيكون فيه لف لكن لو انتا بتذاكر مش هيفرق معاك لف ولا دوران وكمان اهم حاجه انك تقدم المعامل والتقارير وتخلى منها نسخه معاك عشان بتكون مطلوبه ساعه امتحان الشفوى .
2- الدكتور / عادل الأهوانى : بيشرح الاحتراق في محرك البنزين ويسألك فيه في الميدتيرم وبعد كده بيلغيه وكمان بيشرح الاحتراق في محركات الديزل وغرف الاحتراق وبيدكوا جدول عن غرف أحتراق الديزل لازم تفهمه وبعد كده تحفظه عشان بيجى في امتحان الفاينال كما هو وكمان بيشرح التبريد في المحركات واهم حاجه انك تعرف ازاى انك تحل المساله لان بيكون عليها درجات كتيرة وبتكون عبارة عن تطبيق قوانين الهيت مش حاجه جديدة يعنى واهم حاجات الجداول اللى بيديها في المحاضرا والجرافات اللى بيشرحها عشان بيسأل فيها في أمتحان الشفوى
بالنسبه لامتحان الشفوى لو كان مع الدكتور جمال بتخش وبيسمك كشكول المحاضرات وبيسألك منه ولو لقى في النص محاضرات للدكتور عادل بيسالك فيها
فخلى بالك من دلوقتى اكتب محاضرا كل دكتور ورا بعض
اما لو كان الشفوى مع الدكتور عادل الأهوانى بتخشوا مدرج 148 ويدى كل واحد سؤال وتبدأوا بعد كده انكو تخشوا على الدكتور ويسالك في الحاجه اللى انتاجاوبتها او يسالك في اى حاجهم المنهج ومتقلقوش الشفوى بيكون حلو اوى في المحركات بالذات لو كان مع الدكتور عادل بتكون ايده حلوة اوى في الدرجات
المعيدين : المهندسه أسماء والمهندس ديفيد
الورق طبعا تجيب ورق البشمهندس اشرف مصطفى من كشك المنار وكمان المراجعات بتاعته بتكون حلوة اوى اوى
المادة محاضرتين في الأسبوع وسكشن او معمل

[كريم كامل]

3- هندسة القوى الكهربيه : electrical power engineering
المادة من 150 ( 60 اعمال سنه وميدتيرم , 90 فاينال )
الماده بيديها دكتورين
1- الدكتور / محمود عبد الحميد : وطبعا الدكتور محمود غنى عن التعريف بيديكو العوازل اللى موجوده في أبراج نقل الكهربا والأختبارت التى تتم على معدات الجهد العالى والسيركت بريكر وكل ده حاجات سهله جدا ومش صعبه بس اهم حاجه طبعا الغياب وانتو عارفين نظام الدكتور محمود وبيكون في كتاب على الجزء بتاعه
2- الدكتور / عادل طه : وبيديكوا خطوط نقل الكهربا وكيفيه حساب الparameters of transmission line واهم حاجه انك تحضر عشان الدكتور بياخد الغياب وبينادى بالأسم في المحاضرة والغياب بتاع المحاضرة بيكون على المحاضرة الواحدة حوالى 3 درجات وبيكون في كتاب على جزء الدكتورعادل وفى اخر محاضرة بيعرفكوا الحاجات اللى هيركز عليها في امتحان الفاينال وكذلك الدكتور محمود بيكون معروف الحاجات اللى بيجيبها في الفاينال يعنى الماده دى تعتبر ماده تقدير باذن الله يا شباب
المعيدين : المهندس محمود عثمان وبس
الورق طبعا ورق البشمهندس محمود عثمان من كشك المنار
طبعا عايز اقول أن المادة بيكو فيها نظرى كتير أوى أوى اوى اوى
وامتحان الميدتيرم بيكون جاى سهل يعنى بجد اللى مش هيجيب تقدير في الماده دديه يبقى يستاهل ضرب النار
الماده محاضرتين في الاسبوع وسكشن او معمل

[كريم كامل]

4- التحكم الألى (1): automatic control
الماده من 150 درجه ( 60 اعمال سنه , 90 قاينال )
الدكتور / عبد العزيز مرجان
طبعا اول حاجه اقولها في الماده ديه انكو اوعو تحاولوا انكم تضايقوا او تزعلوا الدكتور او ترغوا في المحاضرة عشان متشربوش من الكاس اللى احنا شربنا منه خليكو حلويين في المحاضرة( اظن انتو عرفتوا الدكتور لما بيزعل بيعمل ايه والدكتور أحمد فريد اعتقد عرفكم كده ) الدكتور على فكرة ايده حلوة في التصحيح ولو انتو كنتو حلويين معاه هيكون هو حلو معاكوا احنا السنه اللى فاتت خصملنا 10 درجات عشان كنا بنرغى بس هو رجعهم بعد كده
وحط امتحان فاينال ما يعلم بيه الا ربنا :z3rt:petlya35ch::petlya35ch::petlya35ch:
احنا السبب في كده عشان احنا اللى زعلنا الدكتور والدكتور كان طيب جدا جدا جدا معانا بس أحنا كنا بنرغى في المحاضرة فخلوا بالكوا من حاجه زى كده
المهم الماده بتتكلم عن تحويلات لابلاس والنظام التحكم المغلق ونظام التحكم المفتوح وكمان بتحلو اى نظام الى مجموعه من المعادلات يتم التعامل معاها رياضيا
فانتا في البدايه هيعلمك يعنى ايه نظام وازاى تعرف كل حاجه فيه وبعد كده ازاى تحوله لمجموعه من المعادلات
بعد كده هتاخدو حاجه اسمها الفريكونسى ريسبونس وهيكون سهل بس حاولوا انكو مش تزعلو الدكتور
واهم حاجه انك تذاكر من المحاضرة عشان الدكتور بيجيب الامتحان من المحاضرة منين من المحاضرة بقا الله اعلم ممكن يقوله حاجه في المحاضرة ويجيب عليها سؤال في الامتحان وممكن يجيب اثبات فمحاضرات الكنترول لازم تتذاكر كلها ومش تقول ده اثبات مش هيجيى لا كل حاجه ممكن تيجى وده فعلا اللى حصل معانا وكمان لازم تحل الشيت ويفضل انك تفكر فيه قبل السكشن
المعيدين البشمهندس احمد سمير والبشمهندس هانى والبشمهندس وسام
الماده دى تبع قسم باور
وخلوا بالكو في نظام بداوا انهم يطبقوه في قسم باور أن مفيش حل في السكاشن( النظام ده مش في الماده ديه بس , لا دا في اى ماده تبع قسم باور )
توقع ان دكتور عبد العزيز يعمل امتحان في اى محاضرة يعنى لازم تيجى المحاضرة وانتا مذاكر
المادة محاضرتين في الأسبوع وسكشن بس الدكتور ساعات بياخد ساعتين ورا بعض وميكونش في محاضرة تانيه
طبعا الورق ورق البشمهندس طارق نجاح من كشك المنار
بيكون في أمتحان ميدتيرم سهل وبسيط ومن المحاضرة
اهم حاجه تذاكر المحاضرا اول باول

[mada_89]

تمام يا بشمهندس كريم وفرت عليا الموضوع ده..مع انى مختلف معاك فى حاجات كده..بس الله يباركلك...

[كريم كامل]

5- الأدارة والتسويق :management & marketing
المادة من 75 ( 50 فاينال , 25 اعمال سنه )
المادة دى منتقسمه جزاين : جزء أداة وجزء تسويق
اولا : جزء الأدارة : الدكتور / اشرف غراب
بجد محاضرة الدكتور أشرف بتكون من احسن المحاضرات بيشرح فيها يعنى ايه ادارة وايه الفرق بين المنظمه الصناعيه والمنظمه الخيريه وكمان بيشرح مستويات الادارة ومهام كل مستوى منهم وكمان القبعات السته للتفكير والفرق بين النظام التقليدى والنظام الحديث في الادارة وبجد محاضرة الدكتور أشرف مش مجرد محاضرات وبس لا دا انتا ممكن تحتاجها وانتا رايح اى انتر فيو وبجد الماده دى تعتبر طفرة ونقطه مضيئه في تاريخ هندسه عين شمس وبيعرفك وانتا رايح اى أنتر فيو تعمل ايه وكمان اسلوبه حلو اوى بيحكى مواقف لناس راحت أنترفيو وايه الغلط اللى هما علموه
تاني: جزء التسويق: الدكتور/ محمد حلمى جبر
في البدايه بيعرفك يعنى ايه سوق ويعنى ايه تسويق وخطه التسويق وحبه كلام نظرى كتير اوى بس الجزء ده في الامتحان بيكون مكرر كل عام يعنى مفيش فيه لعب
الماده ليها محاضرة كل اسبوع وسكشن كل اسبوعين
المعيدين البشمهندس محمد حمدى وبس
الورق طبعا تصور محاضرت الأول على دفعه او تصور محاضرات موجوده عند كشك المنار
والماده الدفعه اللى قبلينا كان عندها امتحان ميدتيرم فيها اما أحنا مكنش عندنا ميدتيرم
كل سنه وظروفها

[3la2 2l_Din]

لأ ما احنا عايزين نعرف مختلفين في ايه ومتفقين في ايه علشان نقدر نستوعب
فياريت تكلمنا عن وجهة نظرك يا بشمهندسmada_89 (http://www.h3sonline.com/forums/member.php?u=141)
:)

[كريم كامل]

لأ ما احنا عايزين نعرف مختلفين في ايه ومتفقين في ايه علشان نقدر نستوعب
فياريت تكلمنا عن وجهة نظرك يا بشمهندسmada_89 (http://www.h3sonline.com/forums/member.php?u=141)
:)

هو انتا مش واثق في كلامى يا علاء
انا كده زعلان منك
:whistling::whistling::whistling:

[E-H-A-B]

العملية مش عملية زعل ياكيمو
عاوزين الاراء كلها وزى مانت عارف الاختلاف فى الراى لايفسد فى الود قضية

[كريم كامل]

6- مقرر أختيارى (2)
الماده من 75 ( 50 فاينال , 25 أعملا سنه ) طبعا لازم تختار الماده وتحددها في سكرتاتريه قسم ميكالنيكا قوى اللى انا قولت على مكانها قبل كده الترم التانى في مادتين اختيارى
1_ CNC:الدكتور / محمد عبد المحسن : الماده سهله وحلوة ولذيذة ومش بتاخد وقت في المذاكرة بس أهم حاجه انك تشترى الكتاب اللى بستين جنيه وتعمل التقرير اللى الدكتور طالبه في نهايه الترم وكمان انك تحضر اة تكتب أسمك في الحضور باى طريقه
2- طلقه متجددة وجديدة : بتتكلم عن الطاقه الشمسيه وطاقه الرياح انا مخدتش الماده ديه بس هى تقريبا حلوة وتبع باور بيديهخا كذا دكتور من باور زى الدكتور أحمد العاصى والدكتور قداح شاكر
الماده محاضرة في الاسبوع وسكشن كل اسبوعين
طبعا الناس اللى واخدة سى ان سى مفيش عندها سكاشن
ورق السى ان سى بيكون موجود بره في كشك المنار
اتمنى انى أكون قي افدتكم ولا تنسونى من صالح دعائكم وادعولى انى اخد مشروع تكييف مركزى في رابعه عشان انا لو مخدتش المشروع ده هزعل جدا جد جدا

[3la2 2l_Din]

هو انتا مش واثق في كلامى يا علاء
انا كده زعلان منك
:whistling::whistling::whistling:
ههههههههههههه
واثق في كلامك أكيد يا حبي
بس وجهات النظر مافيهاش صح وغلط لكن فيها اختلاف وأنا عايز أعرف وجه التشابه ووجه الاختلاف مش أكتر
لكن المعلومات نفسها أكيد مصدقك فيها أنت بتتكلم في ايه بس يا كيمو(:

[كريم كامل]

ههههههههههههه
واثق في كلامك أكيد يا حبي
بس وجهات النظر مافيهاش صح وغلط لكن فيها اختلاف وأنا عايز أعرف وجه التشابه ووجه الاختلاف مش أكتر
لكن المعلومات نفسها أكيد مصدقك فيها أنت بتتكلم في ايه بس يا كيمو(:
انا على فكرة مش قصدى حاجه خالص
انا قصدك انكشك بس يا علاء

[كريم كامل]

وانا فعلا دلوقتى عايز اعرف هو مختلف معايا في ايه
ممكن رايى انا في ماده او دكتور غير رايه
وبجد نفسى يخش يقول هو مختلف معايا في ايه ومتفهومنيش غلط يا جماعه انا والله العظيم كل قصدى انكو تستفيدوا وبس

[كريم كامل]

تمام يا بشمهندس كريم وفرت عليا الموضوع ده..مع انى مختلف معاك فى حاجات كده..بس الله يباركلك...
اكيد انتا مختلف معايا في رايى في الفيبراشن :c::c:
ويا ريت لو انا نسيت اقول حاجه تخش وتقوله عشان انا طبعا مش هقول كل حاجه
ويا ريت توضح انتا مختلف معايا في ايه ؟؟؟؟

[3la2 2l_Din]

انا على فكرة مش قصدى حاجه خالص
انا قصدك انكشك بس يا علاء
عارف يا حبي


وانا فعلا دلوقتى عايز اعرف هو مختلف معايا في ايه
ممكن رايى انا في ماده او دكتور غير رايه
وبجد نفسى يخش يقول هو مختلف معايا في ايه ومتفهومنيش غلط يا جماعه انا والله العظيم كل قصدى انكو تستفيدوا وبس
عارف ومنتظرين معاك الرد بتاعه(:

[mada_89]

يعنى الاختلاف مش فى نقط جامدة اوى...يعنى انا شايف ان السنة دى اسهل بكتيير اوى من تانية انك تجيب تقدير..و حاجة تانية انا شايف ان محاضرة دكتور قداح ملهش لزمة انك تحضرها طالما فى حد هيحضرك(مع انى كنت بحضر)..ونفس الكلام دكتور هداية(بردو كنت بحضر)...وحاجت تانية كده بس انتا عملت الواجب مع الناس الصراحة..بس كدة...

[mada_89]

افتكرت بردو حاجة تانية كده(لما هفتكر حاجة هقول على طول)....انتا قولت ان دكتور هشام الغياب اللى بياخدو اللى هوا كان غياب واحد بس اللى بيكون غايب بيشيل حتى لو حالل حلو....انا محضرتش والحمد لله نجحت وكنت قريب شوية من الجيد...ماهو مش معقول تبقى مصر تطلع من كاس العالم بعد ما كونا بنقول مين معانما فى مجموعة كاس العالم وعايزنى تانى يوم اروح الكلية:lol:....بس ده مش بقلل من اهمية المحاضرة..المحاضرة مهمة جدا والدكتور قال فكرة الامتحان مرتين فى محاضرتين مختلفتين..زى مانتو شايفين الاختلاف مش فى نقك جامدة اوى...بس كده..

[كريم كامل]

صلى على النبى يا احمد انا همسك كلامك واحدة واحدة
اولا انتا بتقول سهله
لو كانت سهله عن تانيه كان عدد الامتياز هيكون أكبر من عدد الامتازات اللى في تانيه
انتا عندك امتياز واحد بس طب ازاى سهله ؟؟؟؟؟؟؟؟؟؟
وكمان انا في ناس اعرفها شخصيا كانت جايبه جيد جدا في تانيه وللاسف جابت جييد في تالته
أنا مش قصدى أخوفكم بس أنا بعرض الواقع اللى موجود
وكمان مينفعش أقول على المنتدى ان المحاضرة ملهاش لزمه افرض حد دخل وقرا كده ممكن ياذى الناس كلها وخلى بالك دكتور قادر هيدينا تربو فى رابعه دا غير انك ممكن تنزل معاه مشروع او يكون من ضمن الدكتاترة اللى انتا بتناقش المشروع معاهم او ممكن تقع معاه في الشفوى
اما محاضرة الدكتور هدايه فهى مهمه جدا عشان الدكتور قال فكرة قبل الميدتيرم وجابها بعد كده في الميدتيرم واغلب الناس معرفيتش تحلها
والله الدكتور قالها هنت كده وانا كنت كاتبها وراه والحمد لله حليتها في الميدتيرم بس جبت برده جيد فيها :P:P:P:P
ولو في حاجات تانيه قولها عادى
الموضوع ده عشان تبادل وجهات النظر

[كريم كامل]

افتكرت بردو حاجة تانية كده(لما هفتكر حاجة هقول على طول)....انتا قولت ان دكتور هشام الغياب اللى بياخدو اللى هوا كان غياب واحد بس اللى بيكون غايب بيشيل حتى لو حالل حلو....انا محضرتش والحمد لله نجحت وكنت قريب شوية من الجيد...ماهو مش معقول تبقى مصر تطلع من كاس العالم بعد ما كونا بنقول مين معانما فى مجموعة كاس العالم وعايزنى تانى يوم اروح الكلية:lol:....بس ده مش بقلل من اهمية المحاضرة..المحاضرة مهمة جدا والدكتور قال فكرة الامتحان مرتين فى محاضرتين مختلفتين..زى مانتو شايفين الاختلاف مش فى نقك جامدة اوى...بس كده..
على فكرة أنا وصلت متأخر يوم المحاضرة ديه ومتكتبتش في الحضور والحمد لله جبت جيد جدا من 81 %
بس انا قبل كده واحد اعرفه كنت باخد منه ورق تالته قالى انو غاب وكان حالل وسلم المشاريع وشالها
وكمان البشمهندس أيمن قالنا ان كان في واحد في منتخب كرة اليد غاب مرة وقفل الفاينال وشيلها ليه برده
كمان البشمهندس ايمن هيبقى ينبه عليهم في كده
وانا قولت الغرض انو بيعلمك بس انك تلتزم لا اقل ولا ازيد
مش كل مرة تسلم الجرة وبعدين الواحد ميحطش نفسه تحت شرط خليك دايما في السيف سايد

[mada_89]

صلى على النبى يا احمد انا همسك كلامك واحدة واحدة
اولا انتا بتقول سهله
لو كانت سهله عن تانيه كان عدد الامتياز هيكون أكبر من عدد الامتازات اللى في تانيه
انتا عندك امتياز واحد بس طب ازاى سهله ؟؟؟؟؟؟؟؟؟؟
وكمان انا في ناس اعرفها شخصيا كانت جايبه جيد جدا في تانيه وللاسف جابت جييد في تالته
أنا مش قصدى أخوفكم بس أنا بعرض الواقع اللى موجود
وكمان مينفعش أقول على المنتدى ان المحاضرة ملهاش لزمه افرض حد دخل وقرا كده ممكن ياذى الناس كلها وخلى بالك دكتور قادر هيدينا تربو فى رابعه دا غير انك ممكن تنزل معاه مشروع او يكون من ضمن الدكتاترة اللى انتا بتناقش المشروع معاهم او ممكن تقع معاه في الشفوى
اما محاضرة الدكتور هدايه فهى مهمه جدا عشان الدكتور قال فكرة قبل الميدتيرم وجابها بعد كده في الميدتيرم واغلب الناس معرفيتش تحلها
والله الدكتور قالها هنت كده وانا كنت كاتبها وراه والحمد لله حليتها في الميدتيرم بس جبت برده جيد فيها :P:P:P:P
ولو في حاجات تانيه قولها عادى
الموضوع ده عشان تبادل وجهات النظر

ماهو انا قولت اسهل على اساس الارقام اللى انا شوفتها وانا بعمل الترتيب..عن نفسى اعلى مجموع اجيبه فى الكلية كان السنادى بس مقبول بردو......وياعم متخافش من اللى خلقك وقول الى فى نفسك وسيبها على اللة...اما دكتور هداية فانا مش شايف اى لزمة للمحاضرة غيرانو بيحل الsolved examples اللى فى الكتاب ودى سهل تجيبها...انا شايف ان الviberation ملهاش حل الا الكورس لان تقريبا مفيش محاضرة ولا سيكشن...لان لو عملت زييى ومخدتش كورس هتتعب جامد طول السنة....لكن فى الاخر ملازم مراجعة م/ايمن بيبقى فيها الامتحان بدون مبالغة باستثناء شوية لعب كده الدكتور بيجيبه بس لو ركزت هتحلو صح ان شاء الله...

[mada_89]

على فكرة أنا وصلت متأخر يوم المحاضرة ديه ومتكتبتش في الحضور والحمد لله جبت جيد جدا من 81 %
بس انا قبل كده واحد اعرفه كنت باخد منه ورق تالته قالى انو غاب وكان حالل وسلم المشاريع وشالها
وكمان البشمهندس أيمن قالنا ان كان في واحد في منتخب كرة اليد غاب مرة وقفل الفاينال وشيلها ليه برده
كمان البشمهندس ايمن هيبقى ينبه عليهم في كده
وانا قولت الغرض انو بيعلمك بس انك تلتزم لا اقل ولا ازيد
مش كل مرة تسلم الجرة وبعدين الواحد ميحطش نفسه تحت شرط خليك دايما في السيف سايد
يبقى مختلفناش يا كيمو...وان شاء الله نروح كاس العالم فى البرازيل من غير ما نتاخد غياب فى الشغل ان شاء الله:lol:...

[كريم كامل]

يا عالم مين يعيش لكاس العالم
وممكن اكون شغال في البرازيل واروح اشجع مصر هناك
بس اهم حاجه ميكونش في جزايرين هناك
او ممكن تكون في الجيش
بس ساعتها هتصحى غظبن عنك

[mada_89]

لا الحمد لله مليش جيش

[كريم كامل]

أنا ليا جيش واملى فى ربنا كبير أنى اخد اعفاء
ادعوا معايا وقولوا يا رب ما أخش الجيش

[som3aa]

عااااااااااااااااش يا كيمو

[النابغة الذبيانى]

الله بجد
الف شكر
وربنا يكرمكم آخر كرم

[3la2 2l_Din]

مش عارف أشكركم ازاي بصراحة:D
بجد ربنا يخليكوا لينا وميحرمكوش مننا أبداً:lol:

[3la2 2l_Din]

ياريت بقيت شباب تالتة تشارك معانا:)

[3la2 2l_Din]

سؤال يا شباب
بالنسبة للمواد الاختيارية بنختارها امتى وفين وازاي؟