تالته مدنى

[Kamal]

طيب ما فيش مشاكل بالنسبة للناس اللي عاوزة تقدم لل Helpful team ممكن حضرتك تخليهم يبعتولي واحنا هننسق معاهم وبخصوص القسم عندكم ... دلوقتي انا بنسق مع الشباب في تالتة ان هيبقي حد منهم متولي متابعة القسم الا ان يتم انتخاب مشرف

[روكا]

مش عندك بس يا امنيه

عندنا احنا كمان
المنتدى نايم اخر حاجة

انا بجد مبدخلش المنتدى غير عشان التسليه
بيتهيالى دا مش هدف المنتدى

لما بدخل وبسال ف الاقسام الدراسيه محدش بيجاوب
طب معموله ليه بقى؟؟؟؟؟؟؟؟

[Saad Saleh]

المشاركة الأصلية كتبت بواسطة E Y G

مش عندك بس يا امنيه

عندنا احنا كمان
المنتدى نايم اخر حاجة

انا بجد مبدخلش المنتدى غير عشان التسليه
بيتهيالى دا مش هدف المنتدى

لما بدخل وبسال ف الاقسام الدراسيه محدش بيجاوب
طب معموله ليه بقى؟؟؟؟؟؟؟؟

طيب ...

هطلب من حضراتكم طلب ..

ادخلو هنا

http://www.h3sonline.com/forums/forumdisplay.php?f=38

دا منتدى تالتة حاسبات ... دفعتي

المنتدى دا تقريبا انشط او تاني انشط قسم دراسي عندنا

و له جهد رهيب , عندنا في حاسبات مفيش دروس خالص

الفريق عندنا بيعمل ملخصات من المراجع و ورق و ينزل حلول الشيتات و الكلام الظريف دا كله بيعمله و يعمله scan و يحطه

عدد الفريق 25 واحد

و مساهمات الناس من الدفعة عالية جدااااااا

لدرجة ان اعضاء هيئة التدريس انزعجو ..

اي ريبورت الناس بتتكلم فيه مع بعض

اي سؤال الناس بتحله مع بعض

الموضوع بقا مشكلة ...




تفتكرو ليه دا حصل في حاسبات و محصلش في مدني ؟؟؟؟

[Saad Saleh]

هو التوبيك صحي ليه دلوقتي !

[روكا]

والله معرفش ليه محصلش ف مدنى ؟؟؟؟؟

التوبيك بقى صحى دلوقتى
عشان انا سالت كذا سؤال ف كذا قسم محدش رد
ف كنت فاكرا ان فى توبيك كان بيتكلم عن كدا

ف قلت بدل ما اعمل واحد فى واحد موجود

[Saad Saleh]

المشاركة الأصلية كتبت بواسطة E Y G

والله معرفش ليه محصلش ف مدنى ؟؟؟؟؟

التوبيك بقى صحى دلوقتى
عشان انا سالت كذا سؤال ف كذا قسم محدش رد
ف كنت فاكرا ان فى توبيك كان بيتكلم عن كدا

ف قلت بدل ما اعمل واحد فى واحد موجود

طيب ...
هو في عاملين :

الأول , دور المنتدى كإدارة
التاني , دور الدفعة كلها


خلينا نبدأ بدور الدفعة , دفعة حاسبات فيها ميزة نسبية عن دفعة مدني ..
عندنا , تقريبا مفيش و لا واحد معندوش نت , و مفيش و لا واحد مش بيعرف يستخدم الناس كويس جدااااااا و بيفهم في المنتديات كويس و كدا
و فوق كدا , معظم الناس عندنا متعودة انها تدخل و تقرا من على النت و تدور على حاجات تخص الدراسة على النت عشان شغلنا فيه جزء كبير self study

كمان الدكاترة نفس النظام , الشيتات كلها بتتبعت على المنتدى .. و هكذا و الدكاترة بتدخل ترد

اللي بقوله عمل فرق في حاجة مهمة جدا اسمها "الوعي"

بتوع حاسبات نسبيا عندهم وعي اعلى من ناحية استخدام الانترنت في الدراسة , و دا عادي بالنسبة ليهم و مريح
و هما اصلا مهتمين بالدراسة من اول يوم و كدا

عكس طلبة مدني .. دا مش تقليل منهم لا سمح الله ,
بس طلبة مدني , مثلا بينقلو شيتات كتير , عندهم مشاكل في الحضور , بصفة عامة اهتمامهم بالدرسة اقل , و قد يكون عندهم حق في دا انه طبيعة الدراسة مختلفة .. هناك لازم يذاكر كتير و يقرا من مراجع و كدا و الا هيبقى فاشل

كمان طلبة مدني , كتير منهم مش familiar باستخدام النت ..




الموضوع دا عامل مشكلة كبيرة , استعداد الدفعة انها تعيش على النت و تساعد بعضها مش كفاية





الدور التاني
هو دور إدارة المنتدى , انها تجهز فريق المشرفين , و تديهم الإمكانيات اللي محتاجينها و تشجعهم
و تبتدي تعمل دعاية للمنتدى عشان الناس تدخل عليه و كدا



قبل ما اكمل كلام

ايه تعليق حضرتك على الكلام دا ؟

[روكا]

المشاركة الأصلية كتبت بواسطة Sa3dsh

عكس طلبة مدني .. دا مش تقليل منهم لا سمح الله ,
بس طلبة مدني , مثلا بينقلو شيتات كتير , عندهم مشاكل في الحضور , بصفة عامة اهتمامهم بالدرسة اقل , و قد يكون عندهم حق في دا انه طبيعة الدراسة مختلفة .. هناك لازم يذاكر كتير و يقرا من مراجع و كدا و الا هيبقى فاشل

كل دا مش تقليل
والله احنا كمان لو مازكرناش هنبقى فشله

بيتهيالى مفيش حد مبيذكرش وبيبقى ناجح

اوك اهتممانا بالدراسه اقل منكو طبعا
بس مش اقل اوى لازم نذاكر برضو

انما انتو مش المفروض تختارو المشرفين على حسب اهتمامهم بالدراسه ولا ايه ؟؟؟؟؟

ما علينا

كمل كمل
عايزا حل ياريت
المنتدى بقى بيمثلى تسليه بس وتضييع وقت

[Saad Saleh]

طيب , انا فعلا مقصدش التقليل و الله بس ستايل الدراسة مختلف
شكل الاهتمام مختلف

عندنا قليل جدا لما حد بينقل شيت , عكس مدني طبعا !
عندنا , الناس مضطرة تفتح جوجل و تدور و تفتح مراجع عشان مفيش ورق

فشكل الاهتمام نفسه , مختلف , احنا ملناش وسيلة تانية ..




دا فرق مهم جدا , بين حاسبات و اتصالات و بقية الاقسام كلها



الكلام بيأثر لما نيجي نعمل فريق ,
اول مشكلة بتقابلنا مش بنلاقي ناس ,
تاني مشكلة , لو لقينا ناس , مش بنلاقي شغل
تالت مشكلة , لو الناس اشتغلت شغل عالي زي اولى ميكانيكا السنة اللي فاتت ... الدفعة مش بتتجاوب معاهم عشان بيذاكرو اخر السنة , العيال جالهم احباط و الله


عشان نحل الازمة دي , محتاجيين اننا ننشيء الوعي وسط الدفعة اصلا

و دا اللي بدأنا نعمله السنة دي ,و بدأناه بقسم ميكانيكا عشان عندهم نفس الازمة

بدأنا نعمل زيارات .. و ننزل للناس في المحاضرات نكلمهم عشان يعرفو السايت ..

و هكذا

واحدة واحدة , عجلة ميكانيكا بدأت تمشي




فالقصة دي عشان تتحل محتاجة تعاون الطرفين ,

ادارة المنتدى تبتدي تعمل دعاية و تدور على مشرفين , و تهيأ الناس انها تشتغل و كدا

و دور الدفعة بيفرق , نشاطها , و عدد الناس اللي عاوزة تبقى مشرفين منها , و حماسهم للموضوع , كل محاضرة يقولو , ياخدو الورق من الدكاترة يرفعوه و هكذا



احنا محتاجيين الاتنين


في حاجة مهمة ,

انا شغلي في الاقسام العامة , فقسم تالتة مدني مش ظاهر عندي اصلا

انا معرفش في كام مشرف و شغلهم عامل ايه ..

بس اغلب ظني ان القسم محتاج ناس و لو مش محتاج مشرفين يبقى محتاج اعضاء كتير تشارك فيه فيشتغل و يبقى احسن و انشط من حاسبات لأن دفعة مدني رجالة .. و عددهم اكبر



بس

[روكا]

بس
انا مش تالته مدنى

مش عارفا اقول ايه

احسن حاجة اقولها

اه اه

[Saad Saleh]

انا مخدتش بالي من الدفعة , عشان التوبيك كان تالتة

و ليه اه اه ؟




بصفة عامة , مدني و ميكانيكا و عمارة , حتى تقييمنا للشغل بيكون كدا , دي اقسام مرهقة لينا



القصة محتاجة مجهود , مفيش حاجة بتيجي بسهولة ,
لازم ناس كتير تطوع من الدفعة و تكون حابة الشغل دا ...

في حاجة كمان ,

انا بصراحة بتضايق لما حد يقول انا داخل افرفش في المنتدى

لأننا منتدى دراسي اولا

و السبب التاني , اننا بنبذل جهد كبير قوي في الأقسام العامة عشان نحاول نضيف لنفسنا اي حاجة برا الدراسة ,

فاللي بيحب الأدب , اهلا بيه , اللي بيحب الرسم , اللي بيحب بتناقش في القضايا العامة , في الدين , في الفن و هكذا

و في ناس كتير اتعلمت حاجات كتير من المنتدى هنا اثرت في حياتها , و انا واحد منهم و ناس كتير تاني

[روكا]

اه اه

[Λ7MD]

بصفة عامة , مدني و ميكانيكا و عمارة , حتى تقييمنا للشغل بيكون كدا , دي اقسام مرهقة لينا

أنت عشان كهربا يعني ما جبتش سيرتك

[abo yehia]

طيب هو سعد جاب من المفيد كله (جاب من الاخر يعنى )
بس انا هاعلق على شوية حاجات كده تخص دفعه اولى مدنى

عندنا قليل جدا لما حد بينقل شيت , عكس مدني طبعا !

جزء زى ده احنا حاولنا اننا نقلل منه ولغينا حلول الشيتات وقولنا اننا هنبدلها باننا هنتناقش مع بعض فى الحل كانت النتيجه ايه؟؟؟؟؟؟؟؟؟؟؟
الناس كلها ثارت وزعلت وفى ناس بطلت اصلا تدخل على المنتدى عشان كنت بتدخل تاخد الحلول وخلاص
ولما كان بيتفتح موضوع عشان مناقشة الشيت كان بيبقى بالكتير 3 او 4 الى بيردوا

اول مشكلة بتقابلنا مش بنلاقي ناس

ودى بقى اصعب جزء فى مدنى
لان مفيش حد عنده استعداد انه يساعد اغلبية الناس ( مش كلهم ) عايزين ياخدوا حاجه جاهزه بدون اى اشتراك منهم فيها يعنى بجد طانت معاناة لحد ما اتوجد تيم يعمل الشغل ده

ولما ربنا كرمنا وابتدينا نشتغل ظهر اخطر جزء بقى

لو الناس اشتغلت شغل عالي زي اولى ميكانيكا السنة اللي فاتت ... الدفعة مش بتتجاوب معاهم عشان بيذاكرو اخر السنة , العيال جالهم احباط و الله

يعنى كلمة احباط دى بجد قليله جدا
يبقى فى تاخير فى اى حاجه بنلاقى الناس كلها زعلانه ومتضايقه ولما كل حاجه تتظبط التيم مش بيلاقى تفاعل ولا شكر حتى

واكبر مشكله بتواجهنا فى مدنى بقى
ان الناس مش بتقدر ان المشرفين دول طلبه زيهم
عندهم مذاكره وامتحانات زى باقى الطلبه
ولما حد بيسال سؤال بيبقى عايز الاجابه بعديها ب 5 ثوانى مش بيبقى فى مراعاه انه ممكن المشرفين يكونوا مش فاضيين او مش موجودين

بس ان شاء الله فى افكار بنحاول ان احنا ننفذها عشان ننشط القسم
بس فى الاخر مش احنا كل حاجه
لازم الاعضاء يكون ليهم دور معانا

فى الاخر بس انا ليا تعليق صغير على جمله

المنتدى بقى بيمثلى تسليه بس وتضييع وقت

كل واحد بيدخل المنتدى بيبقى عارف هو عايز ايه
وانا هادى مثال صغير حصل فى الترم الاول قبل امتحان المساحه
المشرفين بتوع المساحه فتحوا موضوع للمناقشهوفضلوا صاحيين الليل يوم الامتحان عشان لو حد محتاج حاجه
ومفيش سؤال واحد اتسال ومش هاقول على الياس اللى حصل للمشرفين
ملحوظه ( اكيد الدفعه كلها مش دكاتره مساحه عشان الكل عارف الماده دى عامله ازاى )

يعنى اللى بيبقى عايز يستفيد هيستفيد واللى عايز يتسلى هيتسلى
وربنا يوفق الجميع ان شاء الله

[روكا]

انا كنت قلت المنتدى نايم اخر حاجة
هو الصراحة كان كدا فعلا

انما امبارح الصراحة كان جامد جدا
بجد يارب يفضل كدا على طول ف كل المواد

طبعا بشكر البشمهندسه Civil Scorpion

ساعدتنى جدااااااااا امبارح

يارب بقى يفضل كدا على طول